Бакъей Жэмал ещанэщ

ШыщхьэIум и 1 - 3-хэм Алыджым и къалащхьэ Афины щекIуэкIащ бэнэкIэ хуитымкIэ пашэныгъэр къэхьыным хуэунэтIа дунейпсо зэхьэзэхуэ. Абы щызэпеуащ къэрал куэдым я бэнакIуэ лъэщхэр, я ныбжькIэ илъэс 17-м щIимыгъуауэ.

Урысей Федерацэмрэ Къэбэрдей-Балъкъэрымрэ я щIыхьхэр иIэту абы щыIащ Бахъсэн къалэм Олимп джэгухэм хэтыфыну зыщыгугъ сабий зэчиифIэхэм я спорт еджапIэм и гъэсэн Бакъей Жэмал икIи, ди гуапэ зэрыхъущи, килограмм 51-рэ зи хьэлъагъхэм я деж домбеякъ медаль къыщихьащ. Ещанэ увыпIэм щхьэкIэ абы къыпэщIэтащ япон бэнакIуэ Шиинэ Харукыу икIи зэIущIэм и бжыгъэр 12:5-уэ абы текIуащ Жэмал.

Спортсмен ныбжьыщIэм и тренерхэр ПщыукI Артуррэ Бэрэгъун Рустамрэщ.

Къыхэдгъэщынщи, мыбы нэмыщI, Жэмал ехъулIэныгъэфIхэр иджыри иIэщ. ЖыпIэнурамэ, нэгъабэ УФ-мрэ Европэмрэ пашэныгъэр къыщихьащ, дунейпсо зэхьэзэхуэм ещанэ щыхъуащ.

Иджы екIуэкIа чемпионатым командэхэм я медаль бжыгъэмкIэ США-р япэ ищащ, Ираныр етIуанэщ, УФ-р – ещанэщ.

Мэкъуауэ Селинэ домбеякъ медаль къехь

Иджыблагъэ Монголием мас-рестлингымкIэ щекIуэкIа дунейпсо чемпионатым ещанэ увыпIэр къыщихьащ УФ-м и командэ къыхэхам хэту абы щыIа Мэкъуауэ Селинэ. Зэхьэзэхуэм щызэпэщIэтащ къэрал 30-м нэхърэ нэхъыбэм я спортсмен 200-м щIигъу.

Адыгэ пщащэм и хьэлъагъ елъытауэ зыхэта гупым (кг 55-рэ), зэIущIитху щригъэкIуэкIати, абыи япитIыр къихьащ, етIуанэмрэ ещанэмрэ иригъэхьащ, ауэ абы щхьэкIэ къэмынэу етхуанэм щытекIуэри, домбеякъ медалыр зыIэригъэхьащ.

КЪАНШЫУЕЙ Алим.