Бу кюнледе Битеуроссей Халкъ фронтну республикада бёлюмюню келечилери Жол управленияны специалистлери бла бирге «Жашауну ырахат этерча инфраструктура» миллет проектге кёре тынгылы ремонт ишле бардырылгъан эки объектни жокълагъандыла, деп билдиредиле КъМР-ни Транспорт эмда жол мюлк министерствосуну пресс-службасындан.
Аны чеклеринде ОНФ-ну келечиси Изабелла Косумова объектлеге башчылыкъ этгенле бла бирге Каменкада жолда 1,8 километр участкада ишле къалай баргъанларына къарагъандыла. Бюгюнлюкде мында жолну мурдорун, жанларын кючлеп, тротуарланы жангыртып эм адамла солурча жерле ишлеп кюрешедиле.
Андан сора да, «Куба – Псыхурей – Кременчуг-Константиновское» жолну 2,8 километр чакълы бирине тынгылы ремонт этиледи. Ол санда Садовая бла Советская орамлагъа да къараллыкъды. Мында жолну мурдорун кючлеп бошап, бордюрла сала турадыла.
Планнга кёре, объектлени экисинде да тийишли ишле быйылны ахырына бошалыргъа керекдиле.
Жолла бла байламлы кемчиликлени юсюнден Транспорт эмда жол мюлк министерствогъа билдирилсе, аланы кетерирча, терк окъуна мадар этиледи. Ол себепден ОНФ-ну келечилери жангыртыу ишле баргъан неда бошалгъан объектледе болум бла шагъырейленирге ведомствону специалистлери бла бирге терк-терк чыгъадыла. Бир тюрлю кемчилик эсленсе, ол къысха заманда кетерилирге кереклиси эсгертиледи.
Магометланы Сулейман
хазырлагъанды
