Огъары Малкъарда жашагъан Узеланы  Бачини жашы Таусолтаннга 95 жыл толгъанды. Огъурлу акъсакъалны юбилейи бла алгъышларгъа Черек районну  администрациясыны бёлюмюню таматасы Байсыланы Харунну башчылыгъында бир къауум адам баргъанды. Ала анга саугъала элтгендиле, «Уллу Хорламны 80-жыллыгъы»  майдалны да бергендиле.
Таусолтан Огъары Малкъарда туугъанды, башха таулулача, кёчгюнчюлюкню ачылыгъын да сынагъанды, тракторчу, сюрюучю, шофёр болуп да ишлегенди. Аны тёлюсю  къыйынлыкъ сынар ючюн къалмагъанды, алай кёлсюзлюк, мёхеллик да этмегенди, ол замандагъы тёлюча, жигер урунуп, ырахат келир заманыбызны мурдорун салгъанды. 1956 жылда туугъан жерине къайтхандан сора да, бир кюнню къоймай ишлегенди. 
Къыралыбызны тарыхы – ол жаланда  кюнле бла, ишле бла чекленип къалмайды, аны тутуругъу Таусолтанча адамладыла.
Акъсакъалгъа кёп огъурлу сёзле айтылгъандыла. Анга къыралны Президенти Владимир Путинден, республиканы Башчысы Казбек Коковдан эмда Черек районну администрациясыны таматасы Къулбайланы Аландан да алгъышлау письмола келгендиле.
Огъурлу, таза ниетли, ишни сюйген адам, уллу юйюрню  башчысы юбилейине туугъанларыны, туудукъларыны, аладан туугъанланы да  араларында  тюбегенди. Ол келген къонакълагъа, алгъышлагъа да бек ыразы болгъанды, хар бирине  кийик саулукъ, узакъ ёмюр да тежегенди. Аны бютюнда бек къууандыргъанла уа туудукъларыдыла. Ала уа онтогъуз боладыла.

Холаланы Марзият.
Суратда: Узеланы Таусолтан къонакъла бла.