Къэбэрдей-Балъкъэрым и «Жан» жылагъуэ зэгу­хьэ­ныгъэм и деж а фIэщыгъэ дыдэр иIэу щылажьэ ли­тературэ клубым, Шэрэдж районым и ЦIыхубзхэм я зэгухьэныгъэр щIыгъуу, зэIущIэ гуапэ ирагъэ­кIуэ­кIащ. Ар траухуащ куейр къызэрызэрагъэпэщрэ илъэс 90 зэрырикъум. Пшы­хьыр ЩIалэгъуалэм я IуэхущIапIэу Къэщкъэтау дэтым щекIуэкIащ, Шэрэдж му­ни­ципальнэ районым и ад­министрацэр, «КъБР-Ме­диа» IуэхущIапIэр, «Ростелеком» ПАО-м и Къэбэрдей-Балъкъэр къудамэр, КъБР-м Егъэджэныгъэмрэ щIэныгъэмкIэ и министерствэр я дэIэпыкъуэгъуу. 

Iуэхур зэхаублауэ щытащ 2017 гъэм икIи абы лъандэрэ йокIуэкI щIыпIэ нэхъ дахэ дыдэхэм усэ къыщеджэн хаб­зэфIыр. УсакIуэ, тхакIуэ, «Го­рянка» газетым и редактор нэхъыщхьэ, «Жан» лит­клу­бым и унафэщI Къаныкъуэ Заринэ иригъэжьа «Кру­го­ворот поэзии» проектым щыщ зы Iыхьэщ «Чтения на Череке» зи фIэщыгъэр. Илъэс къэс абы и лэжьыгъэм къыхохьэ цIыхущIэхэр - тхакIуэхэр, уса­кIуэхэр, журналистхэр, егъэджакIуэхэр, артистхэр, биб­лиотекэхэм я лэжьакIуэхэр. Iуэхум и тхыдэ къулей иIэжщ, тхыгъэ Iэджэ тратхыхьащ, сурэту трахахэр щэ бжыгъэ мэхъу. 
Районым щыщ усакIуэхэм-рэ тхакIуэхэмрэ я гугъу ящIащ «Горянка» газетым и лэ­жьа­кIуэ Щэрдан Лилианэрэ (адыгэ­хэм) «Нюр» журналым и редактор нэхъыщхьэ Са­банчиевэ Арипарэ (балъ­къэр­хэм). Апхуэдэхэщ, псалъэм папщIэ, Мечиев Кязим, IутIыж Борис, Уммаев Мухьэжыр, Мот­таевэ Светланэ, Бегиев Аб­дуллэхь, Казаков Борис, Хьэх Сэфарбий, Бицу Ана­то­лэ, Журт Биберд, Мы­къуэжь Анатолэ, Табаксоев Мухътар, Алафаев Алим, Османов Хьыйсэ сымэ, нэ­гъуэщIхэри. Мы гъэм пшы­хьым усэ къы­щеджэу хэтащ Шэрэдж рай­оным и ЦIы­хубзхэм я зэ­гу­хьэ­ныгъэ Бо­зиевэ Залинэ зи унафэщIымрэ къуажэхэм щы­щ­хэмрэ. Хабзэ зэры­хъуа­уэ, пшыхьым усэхэр щыIуащ адыгэбзэкIэ, балъкъэ­ры­бзэ­кIэ, урысы­бзэ­кIэ. 
ЗэIущIэр иригъэкIуэкIащ «Круговорот поэзии»-м зэ­пымыууэ хэт Байсултановэ Ина­рэ. Абы къыщыпсэлъа­хэщ Шэрэдж район адми­нистрацэм и Iэтащхьэм и къуэдзэ Ефэнды Тарезэ, Къаныкъуэ Заринэ, Бозиевэ Залинэ, Балъкъэр Ипщэм и ЦIыхубзхэм я зэгухьэныгъэм и гуащэ Цраевэ Любовь, ­Са­банчиевэ Арипа, «Солнышко» журналым и редак­-тор нэ­хъыщхьэ Жэрыщты Залинэ сымэ. ХьэщIэхэр хэ­гъэрейхэм ехъуэхъуащ я щIыналъэм мамырыгъэр щытеп­щэну, дяпэкIи зиу­жьыну.
Усэ къыщеджэ Iыхьэр къы­зэIуахащ районым и шко­лакIуэ цIыкIухэм. Са­бийхэр ягъэгуфIащ Iуэхум зи мылъку хэзылъхьахэм, клубым, цIы­хубзхэм я зэгухьэныгъэм къабгъэдэкI саугъэтхэмкIэ. Зэхьэзэхуэ щIыкIэм тету екIуэ­кIа усаджэм хэтынухэр гупитI зэрищIыкIри, зым «Азалия», адрейм «Ромашка» зыфIа­щыжащ. Абыхэм я усэ къе­джэкIэр (гукIэ зэращIэмрэ ­гъэ­хуауэ къызэреджэмкIэ) къап­щытащ Тхылъыр фIыуэ зылъагъухэм я Къэбэрдей-Балъкъэр зэгухьэныгъэм и унафэщI Шинкарёвэ Ната­лье, Ефэнды Тарезэ, Са­банчиевэ Арипа сымэ. Уна­гъуэмрэ лъагъуныгъэмрэ, анэмрэ анэшхуэмрэ, мамы­рыгъэмрэ гуапагъэмрэ теухуа усэт зэIущIэм и лъабжьэр. Ахэр хэмыту уи нэгу къып­хущIэгъэхьэну щIыналъэм и зыужьыныгъэр?! 
Зэпымыууэ жыпIэкIи ущы­мыуэну Iуэхум хэт Щомахуэ Дарье, Мазуренкэ Маринэ, Iэп­щэ Анзор сымэ къеджащ езыхэм я IэдакъэщIэкI усэ­хэм. Зы илъэси дэкIыркъым «Круговорот поэзии» зэIу­-щIэм зы щIэ гуэркIэ димы­гъэгуфIэу. Мы гъэм ар анэм теу­хуауэ езым зэхилъхьа усэм къеджа Мусуковэ ФатIи­-мэтщ. 
ЗэIущIэм зэныбжьэгъугъэр щытекIуащ. НэгъуэщIуи щы­тыфынутэкъым, сыту жыпIэ­мэ усэ къеджа дэтхэнэ зыми къыхихар и гум дыхьэ, и псэм фIэдахэ сатырхэрат. 
ЗэIущIэм и кIэухыу Бозиевэ Залинэ жиIащ Къэщкъэтау дэт школым урысыбзэмрэ ли­тературэмкIэ и егъэджакIуэ Кульбаевэ Ларисэ и уна­фэщIу, районым литературэ клуб къызэрыщызэIуахыр. «Усыгъэр къэхъугъэ те­лъыджэщ. Дунейм нэгъуэ­щIынэкIэ дрегъэплъ абы, щIэ Iэджэ къытхузэIуех, зыде­гъэгъэпсэху, дегъэхъуапсэ. Литературэ клубым ди псэ­купсэр нэхъ бей зэрищIынум шэч къытесхьэркъым», - жиIащ Ларисэ. 
Къэбэрдей-Балъкъэрым и хъыбарегъащIэ IуэхущIапIэ­хэм щылажьэхэр жыджэру хэтащ зэIущIэм. «Советская молодёжь» газетым и ре­дактор нэхъыщхьэ Суановэ Залинэ тепсэлъыхьащ ди республикэм къыщыдэкI га­зетхэмрэ журналхэмрэ. 
Iуэхур зэрекIуэкIыр эфир занщIэкIэ къыщагъэлъэ­гъуащ КъБР-м Егъэджэ­ны­гъэмрэ щIэ­ныгъэмкIэ и ми­нисте­р­ст­вэм Интернетым щи­Iэ на­пэ­кIуэцIымрэ ВК соц­се­тымрэ.

Тхыгъэри сурэтри зейр ИСТЭПАН  Залинэщ.