Кёп болмай«Россети Северный Кавказ» - «Каббалкэнерго» биригиуню бёлюмюню таматасы   Резуан Загаштоковну башчылыгъы бла балансла комиссияны ишчи  кенгеши болгъанды. Анда  быйыл алты айгъа абонентлени  89,1 проценти ток ючюн  4,3 миллиард сом тёлегенлерин билдиргендиле. Былтыр бу заман бла тенглешдирип айтханда, ол  608 миллион сомгъа кёбюрекди. 

 - Сагъынылгъан кезиуде  районлада электрокюч сетьлени барысы да ахшы жетишимле болдургъандыла. Ол санда  Зольск, Терк, Май, Прохладна эм Черек районлада тёлеуле 95-98 процентге жетдирилгендиле,-  дегенди  Резуан Загаштоков. 

Эсге сала айтсакъ, кёп заманны уллу борч этгенлени тизмесинде  алчы жерледе жашау журт-коммунал мюлк предприятияла къаладыла. Жылны башындан бери ала хайырланылгъан ток ючюн «коммунальщиклеге» борчларыны жаланда  24 процентин тёлегендиле.  Саулай алып айтханда, бюгюнлюкде аланы 3,3 миллиард сом берликлери барды.

Энергетикле уллу кёллюлюк этип кёп заманны тёлемегенледен ахчаларын сюд бла алыргъа таукелдиле. Бюгюнлюкде бу жаны бла уллу иш бардырылады.  Аны бла  бирге, болум иги жанына тюзелирча    толтуруучу власть органланы  да  байламлыкъда ишлерге чакъырадыла.

Магометланы Сулейман.