Республиканы маданият фонду быйыл бла тёртюнчю кере  «Бек иги  коммерциялы болмагъан организация» деген сыйлы атха тийишли болгъанды.  Ол конкурсну  КъМР-ни Миллетлени ишлери эмда жамауат проектле жаны бла министерствосу бардырады.

Фондну ишлерини баш магъаналы борчу- миллет культура арала бла  эмда жамауат организацияла бла къаты байламлыкъда ишлеудю.  Фонд,  РФ-ни Конституциясына эс буруу бла чекленип къалмай,  Миллетлени ишлери жаны бла  Федерал агентство жарашдыргъан «Россей Федерацияны  къырал миллет политикасыны  стратегиясын»  да эсге алып тамамлагъан жумушларын алай бла бардырады. Документде  кёп миллетли Россейни халкъларыны бирлигин,  адет–тёрелерин, культураларын, тиллени  сакълау жаны бла ишлени кючлендириуню магъаналылыгъы уллу болгъаны чертиледи.

Маданият фондну ишини юсюнден  аны председатели Люаза Макоева  билдириу этгенди:  «Россей – дунияны башында эм уллу эмда аны жеринде 190 аслам  миллетлени келечилери жашагъан  къыралды. Миллет политиканы жангы  стратегия  политикасы  регионлада жашагъан миллетлени  араларында тенглик, тынчлыкълы жашау болуруна  аслам эс бурады. Бюгюнлюкде Къабарты-Малкъарда  миллетлени араларында келишиулюк болур ючюн тамамланылгъан ахшы  тёреле бютюн кючлене, жашауда кеслерине кенг жол таба барадыла.

Вороковну атын жюрютген маданият фонд  16 миллет культура араланы бирикдиреди. Ала бары да  кеслерини  миллет энчиликлерин  сакълауда эмда  Къабарты-Малкъарны бурун заманладан къала келген бир бирни ангылаулукъ, шуёлукъ тёрелерине кертичи болуу жаны бла тири ишлейдиле. Аланы араларында  онеки  миллет-культура арала бардыла. Ала: абхазлыланы «Абхазия», дагъыстанлыланы  «Дагъыстан», Азербайджанлыланы «Азери», дюгерлилени  «Ныхас», эбизелени «Риони», корейлилени «Самчели», татарлыланы «Туган тел»,  украинлыланы «Днипро», эстонлуланы «Кодумма», «Къазакъланы  культура  аралары» эмда  миллетле аралы культура ара «Сплочение»  бардыла.  Дагъыда  беш  жамауат организация:  (тюрк –месхетинлилени) «Ватан», (орус  тарых эмда культура) «Вече», (эрменлилени общинасы) «Ахбюр», (белорусланы бирлик ючюн къымылдау) «Сябры», Къабарты-Малкъарны  къазакъ  культура  регион аралары да.

 Аланы баш борчлары – сабийлени эмда жаш тёлюню  миллет культураны, адет–тёрелени, дуния адабиятны, илмуну эмда искусствону билирча, анга жууукъ болурча этиудю эмда  башха халкъланы тёрелерине, адетлерине  хурмет эте билирча юйретиудю.

Холаланы Марзият.