болмагъанды. Сюйген да жокъ, башха да жокъ,-деп 95 жылында да уяла эсгереди  ол кюнлени ушакъ нёгерим.

Къырал некяхны уа  сабийлери туугъандан сора жазгъандыла, жыл санына кёре. Алагъа эки жаш бла эки къыз туугъанды, тёрт сабий ёсдюргендиле Тагибат бла Сауарбий. Абаданлары Валя бла Валера кёчгюнчюлюкде, Тоня бла Керим а бери къайтхандан сора кеси эллеринде  кёргендиле дуния жарыгъын.

Кёчгюнчюлюкден къайтып, Тёбен Чегемге келедиле. Юйлери уллу юй эди мындан кёчгюнчю окъуна. Ол заманда башха миллетден бир юйюр орналып, андан чыгъаргъа унамай тохтайдыла. Артда элде тизгин, председатель, колхоз къуралгъандан сора, милиция бла чыгъарып, Тагибат ата юйюне алай тохташхан эди.

Тёбен Чегем эл тири айнып, колхоз да къуралып, адамла да ишден къачмай, юйюрлерин толусунлай жалчытып, жангы юйле ишлеп, онгуна айланадыла. Сауарбий да,  эллиледен бирича,  лесхозда ишлегенди, тракторчу да болуп бир кюнюн зырафына ётдюрмегенди.Тагибат да биринчиден эллериндеги больницада быстыр жууучу болгъанды, ары аны ишини тынгылылыгъын кёрюп чакъыргъан эдиле. Артда алайда санитарны жери бош болады да, ары кёчюредиле. Столовада аш этиучю керек болгъанында уа, саулай да больницагъа повар этип саладыла. Ма алай бла, пенсиягъа чыкъгъынчы алайда бет жарыкълы, махтаулагъа бла ыразылыкълагъа тийишли бола урунуп тургъанды.

Сабийлени да ариу къылыкъда, ызда юйретгендиле. Ала аталарыны бла аналарыны насийхатларын толтура, жашауда жерлерин тапхандыла. Хар бири да тургъан жерлеринде атларын жаланда иги бла айтдыргъандыла.

Валера аскер къуллугъун толтуруп къайтханындан сора, уллу машинада шофёр болуп ишлегенди. Валя, окъуудан сора тюкенчи болургъа сюйген эди, окъуй тургъанлай Тырныауузгъа эрге кетгенди. Тоня да бери тюкенде ишлерге келеди да, эрге мында барады. Валера да мында жашай эди.  Керим а, эгечлерине келе, шофёр курслагъа окъуй, бир къызны сюеди да, ол да бери кёчюп къалады. Элде Сауарбий бла Тагибат кеслери къалгъанларындан сора, ала да сабийлерине къаршы фатар алып, Тырныауузгъа кёчерге оноу этедиле. Сауарбий бла терен къартлыкъгъа дери жашагъанды  хапарымы жигити. Аны жан нёгери онюч жыл мындан алгъа, 87 жылында,  дуниясын алышханды. Андан сора Тагибат баласыны ачыуун да сынагъанды. Эм гитчеси Керим къыйын ауруудан ауушханлы  бир ненча  жыл болады. «Баламдан бери уа, арталлыда тозурап къалгъанма»,-деп кёз жашларын букъдуралмайды ынна.

Валераны абадан къызчыгъы Зояны туугъанынлай окъуна кеслерине алып ёсдюргендиле аппа бла ынна. Андан бери да балаларындан, аладан туугъанладан да жаланда Зоя бла жашаргъа сюйюп, аны биргесине тургъандыла. Аппа дуниядан кетгенли, ыннасына Зоя   ариу къарап турады. 

Бу огъурлу ыннаны къатында адам аны бла бирге озгъан ёмюрге барып къайтханча, алай  хычыуун кёрюнеди. Ол кесин бек насыплыгъа санайды. Бюгюнлюкде онеки туудугъу, отуздан артыкъ учхуну барды. Тагибат беш тёлюню абаданыды. Биз да, «Заман» газетни редакциясы, Улбашланы Тагибатны туугъан кюню бла алгъышлай,  анга саулукъ тилейбиз. 

Темуккуланы Асият.