«Радуга» сабий  лагерьде «Къоркъуусуз эм саулукълу жай – 2025» деген уллу ведомствола аралы акция бардырылгъанды. Аны мураты – гитчелени къоркъуусуз жашау бардырыргъа юйретиу эм саулукъларын игилендириу эди.

Акция регионну талай къырал органын бирикдиргенди: МЧС-ни Баш управлениясын, от ёчюлтюу-къутхарыу службаны, волонтёр биригиулени бла сейирлери болгъан министерстволаны. Ол къоркъуулу  мекямдан сабийлени жарау халда чыгъарыу бла башланнганды. Къутхарыучуланы айтханларын эм эсгертиулерин толтура, устазла бла сабийле, арбазгъа чыкъгъанларындан сора, мекямда адам къалмазча соруу башланнганды. Аны кезиуюнде экеулен ичинде болгъанлары тохташдырылып, къутхарыучула аланы ызларындан баргъандыла, эшикде уа ачыгъанлагъа медикле къарагъандыла (битеу бу ишле жарау халда баргъандыла).   

Сынауладан сора уа, лагерьни арбазында зауукълу юйрениуле башланнгандыла: сабийле от ёчюлтюучюле болуп ишлеп кёргендиле, биринчи медицина болушлукъ этиуню жашырынлыкъларына тюшюннгендиле, жолда жюрюуню жорукъларын айтхандыла, инсан кесине, башхалагъа да къоркъуу салмазча, кесин къалай жюрютюрге керек болгъаныны юсюнден билимлерин кёргюзтгендиле. Ызы бла спорт эришиулеге къатышхандыла, асфальтда суратла ишлегендиле. Бютюнда сейир а алагъа от ёчюлтюучю машиналаны кёргюзтюу  болгъанды, сабийле къутхарыучуланы кийимлерин кийгендиле, жана тургъанны ёчюлтюрча суу къалай жиберилгенине къарагъандыла, ахырында уа алагъа эсгертиуле бла китапчыкъла эмда  татлы ашарыкъла юлешиннгендиле. 

Хабибуллахланы Зульфия.