Къабарты-Малкъарда  «Жашау этерге инфраструктура»  миллет проектге кёре регион магъаналы жолла  жангы излемлеге келиширча  мадарла этиледиле. Алагъа тынгылы ремонт бардырылгъандан тышында, кече жарыкъ болурларына  да эс бурулады, деп билдириледи КъМР-ни  Транспорт эмда жол мюлк министерствосуну пресс-службасындан.

Алай бла бюгюнлюкде Ташлы-Тала, Нейтрино, Каменка, Александровская, Дейское, Тёбен Курп эм Сармаково элледе  20 километрден асламда  чыракълы чыпынла салынадыла. Аллай  мадарны хайырындан жоллада бла орамлада осал болумланы саны азайырыкъды, водительлеге, жаяу жюрюгенлеге да табыракъ боллукъду.

Андан сора да, быйыл сагъынылгъан проектни чеклеринде регион магъаналы жолланы 40 километр чакълы биринде тийишли ишле тамамланыллыкъдыла. Ол санда  Майский, Нарткъала шахарланы бла Терекское, Шалушка,   Аргудан, Котляревская эм Эски  Черек эллени орамлары жарыкъ болурча къошакъ  мадарла  этилликдиле.

Сагъынылгъан объектледе бетондан бла темирден чыпынла, трансформатор подстанцияла, токну аягъан   чыракъла  башха затла да  хайырланыллыкъдыла. 

Саулай алып айтханда, жылны ахырына дери 62 киломер чакълы бирде чыракълы чыпынла орнатыргъа белгиленеди.

Магометланы Сулейман.