Кёп болмай Моквада «Россия» миллет арада «Сени выпускноюнг» деген аты бла студентлени битеуроссей байрамлары болгъанды. Анга къыралны регионларындан алты жюзге жууукъ  айырмалы студент чакъырылгъанды. Аланы араларында КъМКъУ-ну социал-гуманитар, математика эм керти илмуланы, жаякъ-бет хирургия эм стоматология институтларын бошагъан  Журтубайланы Диана, Алеся Шогенова эм Диана Лигидова да болгъандыла. 

Байрамны баш магъанасы – студентлени жетишимлери, ол санда вузланы бла жаш адамланы биригиулерин айнытыугъа къошумчулукъ этгенлери ючюн  белгилергеди. Андан сора да, бирге билим бериуню, илмуну эм маданиятны айнытырыкъланы къауумун да къураргъады. Бу жол ол выпускниклени бла университетлени арасында байламлыкъ юзюлмез ючюн «Бирге болайыкъ» деген чакъырыу бла ётгенди.

Жаш адамланы Россейни Илму эм бийик билим бериу  министрини орунбасары Ольга Петрова алгъышлагъанды.

– Бюгюн къыралны айырмалы выпускниклери жыйылгъандыла. Акъыллыла, ариула, тириле эм жууаплыла. Алагъа къарасанг, билим бериуде жангычылыкъла къыйматлы болгъанларын  ангылайса. Быллай кезиуде тамблагъы кюннге ышанырыгъынг, жетишимлеге итиниригинг да келеди. Биз не заманда сизни бла биргебиз! – дегенди ол.

Программагъа кёре билим бериу жаны бла «Жамауат», «Чыгъармачылыкъ», «Илму», «Медиа», «Насийхатчы» эм «Спорт»  темалагъа жораланнган тюбешиуле эм маданият акцияла да ётдюрюлгендиле. Аланы кезиулеринде жаш адамла белгили спикерле бла ачыкъ ушакъ этерге, ол санда жарсытхан сорууларын берирге эм эсгертиуле алыргъа да онг тапхандыла.

Ингирде байрамны жабылыуу болгъанды. Анда студентлени, насийхатчыларыны суратларындан эм вузланы белгилеринден къуралгъан «Россейни студенчествосу бетледе» деген аты бла арт-объектни кёрмючю  ётгенди. Ахырында саугъалау болгъанды, аламат концерт да кёргюзтюлгенди.

Биз ол байрамгъа къатышхан жерлешлерибизни оюмларын да билирге ашыкъгъанбыз.

– Ариу жерледен кёлюм, болмагъанча, кётюрюлгенди. Байрамны бир заманда да унутурукъ тюйюлме. Аны къурагъанла анга уллу къыйын салгъандыла. Алагъа ыразылыгъымы билдирирге сюеме, – дегенди Алеся Шогенова.

Журтубайланы Диана да, айтылгъан сёзлеге къошула, байрамгъа бюсюрегенин, энди алагъа жетишимлеге элтген жангы жол ачылгъанын айтханды. 

– Байрамны бек жаратханма, кёп адамла бла танышалгъанма. Саулай алып айтханда, быллай магъаналы акциягъа къатышханым бла бек ёхтемленеме, – дегенди Диана Лигидова да. 

Эсге сала айтсакъ, байрамны РФ-ни Илму эм бийик билим берген министерствосу, «Россей амалланы къыралы» платформа, Росмолодёжь, «Твой Ход» проект, «Знание» битеуроссей биригиу,  «Россия» миллет ара, «Биринчилени атламлары» сабий эм жаш тёлю организация къурагъандыла.  

КУРДАНЛАНЫ Сулейман хазырлагъанды.