Тырныауузда поликлиниканы мекямыны тынгылы ремонту къыстау барады. Быллай жумуш къыркъ эки жылны ичинде биринчи кере «Узакъ эм тири жашау» деген миллет проектни чегинде саулукъ сакълауну биринчи звеносун жангыртыу - регион программагъа кёре бардырылады.

  Къурулушчула терезе жанларыны блокларын алышхандыла. Мекямны ичинде  кетериллик, жангыдан  къаланырыкъ ишлени толтура турадыла. Дагъыда мекямны тышын жангыртыу бла  ичинде этиллик  жумушланы  да къолгъа алгъандыла.

  Бюгюннгю кюннге шёндюгю оборудование алыннганды. УЗИ, эндоскопия этген стойка, цифралы рентген бла стационар маммография  аппаратла хазырдыла. Бусагъатда бардырыла тургъан жангыртыула бла тюрлениуле районда жашагъан жыйырма бир минг адамны саулукъ сакълау жаны бла онгларын игилендирикдиле. Ремонт ишлени 2025  жылны ахырына бошар муратдадыла.

Темуккуланы Асият.