Къабарты-Малкъарны Курортла эмда туризм министерствосунда 2025 жылда регионда туризмни айнытыу жаны бла конкурсда проектлери хорлагъанлагъа ахча бёлюу бла байламлы жыйылыу болгъанды.

Жашауда бардырыргъа деп алыннган проектлени араларында Кизиловка тёшге ёрлеген жолну тапландырыу да барды. Терренкур Федерал магъанасы болгъан «Нальчик» курортну эм магъаналы эмда шахарчыланы, къонакъланы да бек сюйген, жаратхан жерлеринден бириди.

«Бу проектни шахаргъа, саулай республикагъа да магъанасы уллуду.  Аны жангыртыуну, тапландырыуну юсюнден тюрлю-тюрлю проектлеге къаралгъанды, дагъыда аны бла байламлы сёз да эртте кётюрюлген эди. Быйылгъы жылда уа «Туризм эмда къонакъбайлыкъ» деген Миллет проектге тийишлиликде субсидиягъа заявка берилгенди. Аны тынгылы жарашдырылгъаны бютюн кёпле къол кётюрюрча этерге онг бергенди эмда проект алай бла хорлагъанды. Энди тапландырыу ишлени барыр ючюн деп, министерство элли эки миллион сом бёледи. Терренкурну баш магъаналы жери келир жыл хайырланылыргъа берилликди», - дейди КъМР-ни курортла эм туризм жаны бла министри Аскер Бифов.

Ол чертгеннге кёре, терренкурну тапландырыу, олтуруп солургъа, спортну тюрлюлери бла кюреширге, ол жол бла барыргъа да бютюн ахшы онгла берликди эмда алай бла «Нальчик» курортха да кёп адам сюйюп келирча этерикди, алай бла ол саулукъ сакълауну арасына да айланырыкъды.

Проектни республикада жашагъанладан къуралгъан чыгъармачы къауум жарашдыргъанды. Аланы санына архитекторла, дизайнерле, маркетологла да киргендиле.

Битеу да конкурсну эсеплерине кёре, комиссия республикада келир заманнга туризмни айнытыугъа бурулгъан юч заявканы сайлагъанды. Терренкурну тапландырыудан сора да бассейнле ишлерге деген планла бардыла.

Холаланы Марзият.