Жигерлиги бла махтау тапханды

Социалист Урунууну Жигити деген атха тийишли болгъан таулу тиширыуну 85-жыллыгъына

Озгъан ёмюрню 50-чыи жылларында бизни республикада ийнек саууучуланы урунууда жетишимлерини кезиую башланады. Башха хар негеча, сют малчылыкъгъа да уруш бек уллу хата салгъанды. Фермаланы кёбюсю чачылып, мал аш да жетмей. Малланы саны да бек азайгъан эди. Сют дегенде уа, колхозлада урушдан сора жыллада бир ийнек жылгъа жаланда 700-800 килограмм сют бере эди. Ол а ары дери кёрюмдюледен иги да аз болгъанды.

Партияны оноуу бла эл мюлкню аягъы  юсюне салыу башланады. Аны бла бирге уа мюлк онгланы кючлендириу, ишчилени кёллендириу, алчы затланы эмда илмуда жетишимлени эл мюлкге сингдириу - малчылыкъда уруннганлагъа учунуу бередиле. Республикада мюлкледе сютню кёбейтиу жаны бла тири къармашыу башланады. Фермалада тиширыула къарыуларын, заманларын да аямай,  алай ишлей эдиле.

1963 жылны ахырында «Нальчикский» совхозну ючюнчю бёлюмюнде ийнек саугъан биринчи установка орнатылады. Анга къараргъа уа эм тири ишчилени ашыргъандыла. Чыгырланы Шамкъыз да бу установканы хайырланыргъа тюзелген биринчилени санында болгъанды.

Бир жылдан сора сют кёп болады, анга къуру ол техника угъай, ишчи тиширыуланы тириликлери да себеплик этгенди. Алай бла 1966 жылда Шамкъыз Социалист Урунууну Жигити деген сыйлы атха тийишли болгъанды.

КъМР-ни Архив службасыны жангы тарыхны эсеплеу бёлюмюнде, КПСС-ни Къабарты-Малкъарда обкомуну архив фондунда да Чыгырланы Шамкъызны эл мюлкге салгъан къыйыныны юсюнден кёп документле сакъланадыла. Аны 1966 жылда 9 айны ичинде этген ишини юсюнден справкада былай жазылады:

«…Социалист Урунууну Жигити Чыгырланы Шамкъыз Магомедовна 1966 жылда «Нальчикский» совхозну башхаладан артха къалгъан сют-товар фермасыны башчысы болады. Анда ишни жангыдан къурап, шёндюгю амалланы да хайырланып, жолдаш Чигирова Ш.М. къысха заманны ичинде мюлкде хар нени да иги жанына тюрлендиргенди. Сёз ючюн, былтыр тогъуз айны ичинде анда ийнеклени хар биринден 1187 килограмм сют сауулгъан эсе, быйыл ол 1684 килограмм болгъанды, неда 41 процентге кёп. 1 октябрьге 234 ийнек 183 бузоу тапхандыла. Аны аллында кезиую бла тенглешдиргенде (100 ийнек башына),  бузоуланы саны 68 угъай, 78 болгъанды. Бир центнер сютню багъасы 12 сом бла 13 капекден азайып, 10 сом бла 85 капек болгъанды. Сатылгъан а ол 15 сом бла 50 капекге этиледи. Дагъыда бир центнер продукция чыгъарыргъа азыракъ къыйын салынады».

Улбашланы Мурат хазырлагъанды.

Поделиться:

ЧИТАТЬ ТАКЖЕ:

08.11.2026 - 09:03

Къыйынларына – бийик багъа

КъМР-ни Парламентинде Халкъны бирлигини кюнюне жораланып къууанчлы жыйылыу болгъанды.

07.11.2026 - 09:03

Къурулушланы бардырыу халларын сюзгендиле

КъМР-ни Башчысы Казбек Коков видеоконференция амал бла РФ-ни Правительствосуну Председателини орунбасары Марат Хуснуллинни башчылыгъында бардырылгъан Регионланы айнытыу правительстволу комиссияны п

06.11.2026 - 13:54

«Ол алай жашагъанды – дунияны кенглигине игилик излей»

1 ноябрь Россейни, битеу дунияны да уллу поэти, Къабарты-Малкъарны халкъ поэти,  Ленинчи саугъаны, СССР-ни эмда РСФСР-ни М.

06.11.2026 - 09:40

Тау элде къонакъда

Бу кюнледе Быллым элни китапханасында журналист, жазыучу Османланы Хыйса бла тюбешиу болгъанды. Аны китапхананы таматасы Афашокъаланы Люба къурагъанды.

06.11.2026 - 09:39

Эки жанына да хайырлы болурча

Россейни Аманлыкъчыланы терсликлерине жолукъдуруу федерал службасыны КъМР-де Управлениясыны башчысы Александр Демидов республиканы къурулуш эм жашау журт-коммунал мюлк министрини къуллугъун толтург