Валерий Коков атлы Къабарты-Малкъар къырал аграр университетни быйыл бошагъан жашлагъа бла къызлагъа дипломлары  берилгендиле. Аны бла байламлы  къууанчлы жыйылыу а Нальчикде Жаш тёлюню юйюнде бардырылгъанын бизге окъуу юйню пресс-службасы билдиргенди.

Битеуроссей даражада бийик окъуу юйлени  бошагъанлагъа дипломларын бериу 19 июльда озгъанды. Ол кюн  къуралгъанды КъМКъАУ-ну байрамы да. Аны хурметли къонакълары уа КъМР-ни  Правительствосуну председателини биринчи орунбасары Муаед Кунижев, КъМР-ни  Правительствосуну председатели Мурат Хубиев, республикада Экономика эмда социал жаны бла къоркъуусузлукъ советни секретары Казбек Татуев, КъМР-ни Парламентини председателини орунбасары Жанатайланы Салим, Маданият, граждан обществону айнытыу эмда информациялы политика комитетини  башчысы Текуланы Амырбий, министерстволаны бла  ведомстволаны келечилери, район администрацияланы башчылары, башхала да болгъандыла. 

Жыйылгъанланы байрам бла  регионну оноучусу Казбек Коковну атындан республиканы Башчысыны Администрациясыны таматасы Мухамед Кодзоков  алгъышлагъанды. Ол аграр окъуу юйде билим алгъан жаш тёлю Къабарты-Малкъар Республиканы экономикасын айнытыугъа уллу къошумчулукъ болуруна  ышаныулукъну чертгенди. Аны бла бирге уа профессор-преподаватель къауумгъа усталыкъ  хунерге  тюшюндюргенлери, билим бергенлери ючюн ыспас этгенди. 

Ызы бла уа,  аспирантланы белгилей, ала  илмуну алгъа элтгенлерин эмда аны эл мюлк бла байламлы бёлюмюню  тамблагъы кюнюн  айнытырыкъла болгъанларын чертгенди. Жаш тёлюге кезиулю  жетишимле эмда саулукъ-эсенлик тежегенди. 

Жашланы бла къызланы  университетни ректору Заурби Шхагапсоев да  алгъышлагъанды. Ол кесини сёзюнде бюгюннгю болумлада быллай усталыкъланы алгъан жашлагъа бла къызлагъа сурам уллу болгъанын да ангылатханды. Ала кеслерини  билимлиликлерине  тийишлиликде иш табып, жетишимли да болурларына ийнаннганын айтханды.

- Окъуу юй сизни барыгъызгъа да болушлукъ этерге, бютюнда иш излеуюгюзге себепликге хазырды.  Ол шарт а биз кесибизни  студентлерибиз бла байламлыкъны  излегенибизни ачыкълайды. Жаланда бакалавриатны угъай,  магистратураны, аспирантураны да окъусагъыз ыразыбыз, илму ишге да кёл салгъанлагъа ахшы амалларыбыз бардыла – кесибизде эки  диссертациялы совет барды, - деп, жыйылгъанланы  къатлап алгъышлагъанды Заурби Шхагапсоев.

Саугъалау а, тёреде болуучусуча, жарыкъ халда озгъанды. Ары келгенлеге кеслерини  хунерлерин республиканы жырчылары Текуланы Амырбий, Султан Хажироко, Азамат Цавкилов, Милана Вологирова, «Насып» эмда «Импульс» тепсеу  къауумла, бирсиле да саугъалагъандыла. 

Саулайда ол кюн 512 жаш специалист, ол санда  бакалавриатны, магистратураны, аспирантураны  бошагъанла да, саугъаланнгандыла. Аланы санында 102 адамгъа уа къызыл дипломла берилгенлерин да белгилерчады.

Трамланы Зухура.