Къабарты-Малкъар Республиканы башчысы Казбек Коковну буйругъун толтурууну чегинде Элбрус районну жамауат биригиулерини таматалары, дин ахлулары, эллени башчылары, жаш тёлю, ол санда «Биринчилени атламлары» битеуроссей къымылдауну келечилери бла тюбешиу болгъанды.

Анга республиканы Парламентини депутаты Сотталаны Къурман, жаш тёлюню ишлери жаны бла министрни орунбасары Ахметланы Артур, Элбрус районну жер-жерли самоуправление советини башчысы Тохаланы Хыйса, Элбрус районну администрациясыны башчысы Отарланы Мухтар, УФСБ-ны районда управлениясыны башчысы Сергей Светиков, районну прокурору Марат Еналеев, МВД-ны районда бёлюмюню башчысы полицияны майору Байсолтанланы Къурман-Алий къатышхандыла.

Анда Нальчикде 4-чю июльда полициячыгъа чабыуул этилгени бла байламлы жамауат къоркъуусузлукъну эмда бирликни сакълауну юсюнден айтылгъанды. Энчи эс жаш тёлюню тюз эм таза ниетледе юйретиуге, патриот сезимлерин кючлеуге, жамауатда, бютюнда уа жаш тёлюню арасында экстремизм жайылмазча мадарла этиуге бёлюннгенди. Жаш адамла сорууларын бергендиле, кеслерини оюмларын да айтхандыла.

Тюбешиуню кезиуюнде жыйылгъанла барысы да тынчлыкъны эм къоркъуусузлукъну сакълауда бар амалланы хайырланыуну тюзге санагъандыла. Право низамны сакълаучу органлада ишлегенлени бла аланы юйюрлерине кёл этдиргендиле.

 Арт жыллада социал сетьле бла адамланы акъылларын терс жанына бурургъа кюрешген кезиуле терк-терк тюбейдиле. Алагъа жамауат саулайда къажау сюелирге керекди. Власть эм право низамны сакълаучу органла, дин ахлула, жамауат да кючлерин бирикдирирге керекдиле. Жалгъан билдириуле чыгъаргъанланы ачыкълар эмда тыяр ючюн Интернетде адамла аслам окъугъан социал сетьлени да дайым эсепде тутаргъа тийишлиди.

Темуккуланы Асият.