Кёп болмай Чегем районну администрациясыны башчысы Юра Борсов бардырып Шалушка элде кенгеш ётгенди. Ол «Штауч» микрорайонда таза  суу кереклисича келмегенине жораланнганды. Аны бла бирге башха элледе да бу жаны бла болумгъа къаралгъанды эм тийишли эсгертиуле да берилгендиле, деп билдириледи Чегем районну администрациясыны пресс-службасындан.  

Белгилисича, жай кезиуде таза суу кереклисича  келмегени районну бир къауум элинде уллу жарсыуладан бири болгъанлай къалады. Арт жыллада   жашау журтланы санына иги кесек къошула барады, андан тышында, бахчаларын сугъаргъанла, бассейнлерин  толтургъанла  эм башха затлагъа хайырланнганла да бирсилеге уллу хата салгъанларын ангыламайдыла.   Андан сора да, суу ызланы тозурагъанларын да эсге алырчады.  Аллай бузукълукъла сетьлеге уллу ауурлукъ саладыла эм насосла тийишли халда ишлеялмай, абонентлени асламысы ичер суусуз къаладыла.   
Бюгюнлюкде сагъынылгъан микрорайонну суу бла жалчытырча къошакъ халда суу ызы   скважинагъа къошулгъанды. Быллай амал болумну игилендирирге болушур деп уллу ышаныулукъ барды.

Дагъыда Чегем шахарны баш жанында  жашагъанлада да суулары болмай къыйналгъанларын билдиргендиле.  Мында да Пшеноков атлы орамда скважинаны жангыртырча эм эм суу тёгерек халда басымы бла  берилирча  мадар этиледи.  Экинчи Чегемде да  Алакаевла атлы орамда жашагъанла быйыл кюнле бла  суусуз къалыргъа тюшгенлерин айтып жарсыгъандыла.  Ол не сылтаудан болгъанын билирча, специалистле жерине барып тинтирге  эм болумну  тюзетирча амал излерге айтадыла. 

Саулай алып айтханда, сагъынылгъан проблемала бла байламлы районда энчи ишчи къауум къуралгъанды. Ол адамла  ичер суу бла чырмаусуз жалчытылынырча контроль этерикди. 

Магометланы Сулейман.