Москваны Н.Э.Бауман атлы къырал техника университетини Конгресс арасында студент юйюрлени биринчи Битеуроссей фестивалы ишин башлагъанды. Анга Х.М.Бербеков атлы Къабарты-Малкъар къырал университет кесини проекти бла къатышханды.

Фестивальны ишине къошулургъа 550-ден артыкъ адам, ол санда регионланы, федерал власть органларыны, ректор бёлюмлени келечилери эм студент юйюрле чакъырылгъандыла.

Пленар жыйылыу Федерация Советни Председатели Валентина Матвиенкону, Россей Федерацияны Правительствосуну Председателини орунбасары Дмитрий Чернышенко, РФ-ни илму эмда бийик билим бериу жаны бла министри Валерий Фальковну сёлешиулери бла башланнганды. Жыйылыуну эм магъаналы темасы студент юйюрлеге къыралны эм институтну  жанындан болушлукъ этиу болгъанды.

Россейни эм иги университетлерини бешисини ректорлары, ол санда Къабарты-Малкъар къырал университет да студент юйюрле бла ишлеуде аламат сынамларын кёргюзтгендиле. КъМКъУ-ну ректоруну борчун болжалла халда толтургъан профессор Юрий Альтудов кесини сёлешиуюнде студент юйюрлеге тынчлыкълы онгла къурау университетни баш магъаналы борчларындан бири болгъанын чертгенди.

«Жаланда озгъан жылны ичинде студент юйюрлеге болушлукъгъа 3,3 миллион сом ашырылгъанды. Быйыл да 3,7 миллион сомдан артыкъ бёлюр муратлыбыз. Ол ахча студентлеге юйюр къураулары, сабий тууу бла байламлы эмда юч жыллары толмагъан сабийле ёсдюрген юйюрлеге берилликди.

«Мартда биз ана бла баланы бир отоуун ачханбыз. Жылны ахырына дери дагъыда эки отоу ачар муратлыбыз. Студент юйюрле спорт инфраструктура бла хакъсыз хайырланадыла. Андан сора да, медицина жумушларын учузуракъ жалчыталлыкъдыла. Быйыл университетде «Альтаир» деген билим бериу ара кесини ишин башлайды. Анда ата-аналагъа бла аланы сабийлерине да энчи жер бёлюннгенди. Окъууну бла сабийге къарауну бирден бардыргъан кёп сабийли юйюрлеге деп энчи билим бериу план жарашдырылгъанды. Ананы бла атаны юйюрде ауурлугъун эсге ала, билим алыудан да, ала артха къалмазларын излегенбиз», -дегенди Юрий Камбулатович.

 Фестиваль «Юйюр»  миллет проектни чеклеринде, Россейни Президентинде къырал демография эм юйюр политиканы жашауда бардырыу жаны бла советни, Илму эмда бийик билим бериу жаны бла министерствону, Федерация Советни тутхучлукълары бла къуралгъанды. Студентликни эм окъуй тургъанлай къуралгъан студент юйюрлени не жаны бла да айныуларына себеплик этиу, юйюр байлыкъны, адетлени да сакълау фестивалны магъаналы сорууларындан бири болгъанды.

Темуккуланы Асият.