Ди республикэм лэжьэн щыщIидзащ Шэрэдж гидроэлектростанц цIыкIум. ГуфIэгъуэ щытыкIэм иту ар яутIыпщащ КъБР-м и Iэтащхьэ КIуэкIуэ Казбекрэ «РусГидро» ПАО-м и унафэщI Карпухин Николайрэ.
Шэрэджыпсым тращIыхьа станцым и ухуэныгъэр 2021 гъэм яублауэ щытащ, Кавказ Ищхъэрэ федеральнэ щIыналъэм гидроэнергетикэм адэкIи зыщегъэужьыным епха программэ зэхэ-тым ипкъ иткIэ. ЯутIыпщагъащIэ ГЭС цIыкIур и зы Iыхьэщ Шэрэджыпсым тращIыхьа апхуэдэ станц зэхэтым. МВт 179,1-рэ зи лъэщагъ IуэхущIапIэр хъуащ ди республикэм электрокъару къыщызылэжь IэнатIэхэм я нэхъ ин дыдэ.
Iыхьэ зыбжанэу зэхэт а ГЭС-м и проектыр лIэщIыгъуэ блэкIам и 70 гъэхэм яубзыхуауэ щытащ. 1992 гъэм ирихьэлIэу хьэзыр хъуащ 2010 гъэм нэс тещIыхьа ухуэныгъэ программэри. Ар лэжьыгъэшхуэ къызэщIэзыубыдэ, мылъкушхуи зытекIуэдэну къалъыта проектышхуэт. Апхуэдэу щытми, гъэзэщIа хъуащ. ГЭС зэхэтым и япэ Iыхьэр, Аушыджэр щаухуар, 2002 гъэм и дыгъэгъазэм яутIыпщауэ щытащ. Иджы лэжьэн щIэзыдзагъащIэ станцым МВт 23,4-рэ и лъэщагъщ. Илъэсым къриубыдэу абы къилэжьынущ кВт/ч мелуан 87,1-рэ хъу электрокъару къабзэ. Ар яхурикъунущ унагъуэ 25000-м я лъапсэхэм.
Станцым и лэжьэкIэр хьэлэмэту зэтегъэуващ. Абы къыщагъэсэбэп псыр ГЭС зэхэтым и Iыхьэхэм щагъэлэжьакIэу къокIуэри, лейуэ гъэкъэбзэн хуейкъым.
- Ди республикэм электрокъарукIэ бгъэдэлъ шынагъуэншагъэр нэхъри зыгъэбыдэ, къызэзы-гъэпэщ Iуэхугъуэщ зэфIэкIар. Абы и фIыгъэкIэ зэпыу зимыIэ элекрокъару яIэнущ нэхъапэм абыкIэ гугъу ехьу щыта жылэ пхыдзахэм, - къыхигъэщащ КIуэкIуэ Казбек. - ГЭС-м и ухуакIуэхэми абы и хъер зылъэIэсыну цIыхухэми си гуапэу сохъуэхъу мыхьэнэшхуэ зиIэ Iуэхугъуэр зэрызэфIэкIамкIэ.
Республикэм и Iэтащхьэм къэрал дамыгъэхэр яритащ «РусГидро»-м и IэщIагъэлIхэм, ГЭС-м и ухуакIуэхэм, Къэбэрдей-Балъкъэрым и зыужьыныгъэм хуащIа хэлъхьэныгъэм папщIэ.
