Къэбэрдей-Балъкъэрым и хьэщIащ «Российский центр оборота прав на результаты творческой деятельности» (РЦИС) урысейпсо жылагъуэ-къэрал IуэхущIапIэм и лIыкIуэхэр. КъБКъУ-м бадзэуэгъуэм и 18-м щекIуэкIащ «Интеллектуальная собственность: основа инновационно-креативной экономики. Кабардино-Балкарская Республика 2025» щIыналъэ зэхуэсыр. Ар къызэригъэпэщащ КъБР-м и Правительствэм, РЦИС-м и федеральнэ Iуэхум хыхьэу. 

ЗэIущIэм хэтащ икIи къыщыпсэлъащ КъБР-м и Правительствэм и УнафэщIым и япэ къуэдзэ Говоров Сергей, «Российский центр оборота прав на результаты творческой деятельности» урысейпсо жылагъуэ-къэрал IуэхущIапIэм и унафэщIым и ­къуэдзэ Яковлевэ Иринэ, РЦИС-м къэрал къулыкъущIэхэм ядэлэжьэнымкIэ и департаментым и унафэщI Захаренкэ Александр, РЦИС-м щIыналъэхэм ядэлэжьэ­нымрэ абыхэм зегъэужьынымкIэ и департаментым и унафэщI Соколов Алексей, РЦИС-м правовой эксперт-аналитикэ унэтIыныгъэмкIэ и унафэщI Согрин Никитэ, проект Iуэхухэмрэ протоколкIэ къызэгъэпэщынымкIэ и къудамэм и унафэщI Гордеевэ Аннэ, «Национальный реестр интеллектуальной собственности» АО-м и унафэщI Беленькая Наталье, абы и къуэ­дзэ Осташевская Иринэ, IPEX  онлайн-­биржэм и унафэщI Воиновэ Дарье, Лабораторэ къэхутэныгъэхэмрэ IPChain лэжьыгъэхэмрэ зегъэужьынымкIэ унафэщI Корневэ Владиславэ, франчайзингымкIэ «Scale it»  бжыгъэ платформэм и унафэщI Кизимэ Марие, pr-менеджер нэхъыжь Красюковэ Ксение, хъыбарегъащIэ IэнатIэхэм ядэлэжьэнымкIэ жэуап зыхь IэщIагъэлI Поляков Сергей, къулыкъущIэхэр, экспертхэр, хьэрычэтыщIэхэр, нэгъуэщI­хэри. 
Къэпсэлъахэм жаIар къызэщIэпкъуэж­мэ, нэхъыщхьэу къытеувыIащ республикэм и экономикэм щIэм тету зэрызрагъэужьыну Iэмалхэм,  творческэ лэжьыгъэхэм кърикIуахэр, щIэныгъэ-техникэ унэ­тIыныгъэри къызэщIиубыдэу, къыщапщытэжкIэ бжыгъэ Iэмэпсымэхэр нэхъыбэу къагъэсэбэпын зэрыхуейм.
- Акъылыр творческэ хьэрычэтым и лъабжьэщ. Креативнэ индустрием зегъэу­жьыным бгъэдыхьэкIэ щхьэхуэ хуейщ. Ар зэбгъэхъулIэн папщIэ уи гупсысэхэмрэ ­хуитыныгъэхэмрэ пхъумэн, Iуэхум мылъку хэплъхьэн хуейщ. Ди къалэн нэхъыщхьэр бжыгъэ экономикэр зи лъабжьэ, акъылкIэ къалэжьа мылъкумкIэ IуэхущIапIэ къызэдгъэпэщынырщ. Абы и лъэныкъуэкIэ дызыхуеину псомкIи дыкъызэгъэпэщащ. КъызэрыслъытэмкIэ, мы зэхыхьэр IэмалыфIщ абы зыкърезыгъэхьэлIахэр я Iуэху бгъэдыхьэкIэхэмкIэ зэхъуэжэнымкIэ, я зэдэлэжьэныгъэм адэкIи зрагъэубгъу­нымкIэ. Креативнэ индустриемкIэ экономикэм зегъэужьынымкIэ ар IуэхуфIщ, - жиIащ Говоров Сергей. 
Яковлевэ Иринэ и псалъэм къыхигъэщащ зэхуэсыр Къэбэрдей-Балъкъэрым зэрыщрагъэкIуэкIым абы щыпсэухэм я дежкIэ мыхьэнэшхуэ зэриIэр, абы къыщаIэта Iуэхугъуэхэр хьэрычэтыщIэхэм, креативнэ индустрие унэтIыныгъэм хэлэ­жьыхь­хэм къазэрыхуэщхьэпэнур.
- Къэбэрдей-Балъкъэрым туризмэм, щIыналъэм къыщыщIагъэкI  хьэпшыпхэм зегъэужьыным щIэупщIэ зэрыщиIэм дыщыгъуазэщ. Къэбгъэлъагъуэмэ, уп­щIэм къыхэщIыкIа фэилъхьэгъуэхэм, алэрыбгъухэм, унэр зэрагъэдахэ хьэпшып зэ­мылIэужьыгъуэхэм, Урысейм и нэгъуэщI щIыналъэхэм ямыIэу туризмэм щывиIэ зэфIэкIхэр – а псор хабзэм тету фхъу­мэжын хуейщ. Ар фхузэфIэкIмэ, республикэм хэхъуэ къыхуихьынущ, цIыхухэм я псэукIэр, гъащIэр иригъэфIэкIуэнущ, щIалэгъуалэр нэгъуэщI щIыпIэхэм, къэ­ралхэм лэжьапIэ мыкIуэу, щалъхуа щIыналъэм къинэжынущ, IэнатIэщIэхэр къызэIухынымкIэ щхьэпэ хъунущ, республикэм и цIэр къэралым щызыгъэIуну, нэгъуэщIхэм ямыIэ, зыщIэупщIэ хьэпшып е шхыныгъуэ къыщIэвгъэкIын хуейщ, - жиIащ Яковлевэ Иринэ.
Зэхуэсым и лэжьыгъэм секцэхэм щыпащащ. Абы хыхьэу тепсэлъыхьащ хьэрычэт Iуэхум зэрызрагъэужьынум, къыщIагъэкI продукцэхэр зэрахъумэну иджырей Iэмэ­псымэхэм, нэгъуэщIхэми. 
Республикэм и хьэщIэхэм къалэм и щIыпIэ дахэхэм (Къэбэрдейр Урысейм зэрыгухьэрэ илъэс 400 зэрырикъум и утыкум, КъБР-м и Лъэпкъ музейм, ЩIалэгъуа­лэ творчествэмкIэ уардэунэу Налшык ­щаухуэм, ХьэтIохъущокъуэм и жыг хадэм) зыщрагъэплъыхьащ. 

ТЕКIУЖЬ Заретэ. Сурэтхэр Къарей Элинэ трихащ.