Налшык къалэм нэчыхьхэр щрагъэтх и Уардэунэм щагъэлъэгъуащ дизайнер Дудар Заремэ и IэдакъэщIэкI фэилъхьэгъуэхэр. Iуэху дахэр къызэрагъэпэщащ КъБР-м и Пенсэ фондым, ЗАГС-м и къудамэм и унафэщI Шэру Валентинэ, модельер-дэрбзэр Сэралъп Мадинэ.

 Щыгъынхэр ягъэлъэгъуащ Дудар Заремэ къызэригъэпэща «Насыпым и ныбжь» къэфакIуэ клубым екIуалIэ, илъэс 45-м щыщIэдзауэ 70-м щхьэдэха цIыхубзхэм (Захарченкэ Валентинэ, Сабко Светланэ, Къуэжей Иринэ, Дэшу Валентинэ, нэгъуэщIхэми). Налшык къалэм Щэнхабзэ зыужьыныгъэмкIэ и центрым илъэситI хъуауэ щолажьэ мы клубыр. Абы къриубыдэу мыр и етIуанэ гъэлъэгъуэныгъэщ. Щыгъынхэр псори зи IэрыкIыр Дудар Заремэщ.

 Шэру Валентинэ зэхыхьэм зыкърезыгъэхьэлIахэм яхутепсэлъыхьащ клубым и лэжьыгъэм.

 Фэилъхьэгъуэ щхъуэкIэплъыкIэхэр хьэщIэхэм ягу дыхьащ. Щыгъынхэр апхуэдизкIэ зэщхьэщыкIырти, языныкъуэхэм лэжьапIэ урикIуэну, адрейхэм тенджызым е бгым зыгъэпсэхуакIуэ ущыкIуэкIэ щыптIэгъэну  зэрехъуэпсар къыхагъэщащ. Дизайнерым и IэдакъэщIэкIхэр зыгъэлъагъуэ бзылъхугъэхэм актёр Iэзагъэ зэрахэлъри къагъэлъэгъуащ.

 Дашу Валентинэ жиIащ клубым езым и фэилъхьэгъуэрэ логотипрэ зэриIэжыр. Тхьэмахуэм тIэу къафэм хухах, я узыншагъэр егъэфIэкIуэным хуэщIауэ. Алыдж, ермэлы, журт, адыгэ, нэгъуэщI къафэхэри ягъэзащIэ, вальс, тангэ къофэ. Абы я гукъыдэжыр къеIэт, Iэпкълъэпкъыр зэщIегъэкI. И лъагъуныгъэмрэ гулъытэмрэ папщIэ клубым екIуалIэхэм Заремэ фIыщIэ хуащI.

Я унафэщI Дудар Заремэ драматург цIэрыIуэ Дудар Хьэутий ипхъущ, Ар дизайнер цIэрыIуэщ, и IэдакъэщIэкIхэр художественнэ фильм зыбжанэм къыщагъэсэбэпащ. Италием илъэс зыбжанэкIэ щыпсэуати, итальяныбзэр уэрсэру ещIэ. Клубым зы зэманкIэ ар щригъэджу щытащ. Заремэ икIи къэфакIуэ Iэзэщ. ЯпэщIыкIэ Пионерхэм я унэм зыщигъэсащ, иужькIэ «Кавказ» ансамблым хэтащ. И пьесэм къытращIыкIа спектакль щагъэуващ ЩоджэнцIыкIу Алий и цIэр зезыхьэ Къэбэрдей къэрал драмэ театрым. Апхуэдэ цIыху гъэщIэгъуэнщ гупыр зэхуэзышэсар. Клубым цIыху 20 зэпымыууэ  йокIуалIэ, я нэхъыжь дыдэр илъэс 77-рэ хъуууэ.

 - ИлъэситI хъуауэ мы клубым сызэрыхэтым гукъыдэжрэ къарууэ къысхилъхьэр къыпхуэмыIуэтэнщ, - жеIэ Сабко Светланэ. – Ди унафэщIым и ехъулIэныгъэщ мы гъэлъэгъуэныгъэр. Дэтхэнэ зыми ди фэилъхьэгъуэхэр хэщыпыхьауэ къыхех. «Телемеханика» заводым илъэс 30-кIэ инженер-технологыу сыщылэжьащ. Къуэрылъху-пхъурылъхухэмрэ къафэмрэщ иджыпсту си гукъыдэжыр къэзыIэтыр.

  - Заремэ и лэжьыгъэхэр я плъыфэкIи, я щIыкIэкIи зыхуэбгъадэ хъун щымыIэщ. Къалэр хуэзэшат абы и IэдакъэщIэкIхэм, - жиIащ Сэралъп Мадинэ. - Дахагъэм ныбжь иIэкъым. ЩIалэгъуэри пIалъэ хэубыдыкIам иткъым. Гъэлъэгъуэныгъэм хэтхэр я ныбжькIэ зэщхьэщыкIми, псори дэзыхьэх мы Iуэхум зэришэлIащ. Дэтхэнэ зы фэилъхьэгъуэми шыIэныгъэрэ лъагъуныгъэу ирахьэлIар къыпхуэмыIуэтэнщ. Къалэр зэригъэдахэм шэч хэлъкъым, театрхэми абы и фэилъхьэгъуэхэм хуэдэ щыплъагъуркъыми. ДяпэкIи ефIэкIуэну, и IэщIагъэм хигъэхъуэну си гуапэщ!

 «Горянка» газетым и редактор нэхъыщхьэ, усакIуэ, драматург Къаныкъуэ Зарини Дудар Заремэ ехъуэхъуащ.

 Дудар Заремэ фIыщIэ яхуищIащ гъэлъэгъуэныгъэр къызэзыгъэпэщахэмрэ абы хэтахэмрэ. Фэилъхьэгъуэхэр зыгъэлъэгъуахэм иратащ КъБР-м и Пенсэ фондым къыбгъэдэкI ЩIыхь тхылъхэр.

ТЕКIУЖЬ Заретэ.