КъМР-ни Башчысы Казбек Коков регионланы таматалары бла Москвада билим бериу программагъа – къыралны субъектлерини бла муниципалитетлерини оноучуларына «Адамгъа архитектура» практикумгъа къатышханды. Программаны къураучулары Россей Федерацияны Президентини Администрациясыды, Россейни Правительствосуду, СберУниверситетиди эмда Управленияны бийик къырал школасыды. Баш спикерлери – РФ-ни Президентини Администрациясыны таматасыны биринчи орунбасары Сергей Кириенко, РФ-ни Правительствосуну Председателини орунбасары Марат Хуснуллин, Москваны мэри Сергей Собянин, Сбербанкны Президенти, Правленини Председатели Герман Греф.
Президентибиз Владимир Путинни башламчылыгъы болгъан «Жашаугъа инфраструктура» миллет проектге кёре анда сюзюлген соруула проектни онгларын адамланы жашауларын игилендириуде хайырланыуну тынгылыракъ ангылатадыла.
Шахар къурулушланы комплекс халда айныуларыны ызлары – жашау журтла, ЖКХ, жолла, жамауат улоу, социал инфраструктура, тапландырыу. Эллени, халкъла аралы транспорт коридорланы игилендириу, инвестиция циклланы къысхартыу эм кёп башха ызлада планла этилинедиле, ол а уллу проектлени жашаугъа кийириуге бла ишчи тириликни ёсюуюне себеплик боллукъду. Хар бу ызны айныуу къыралны регионларыны мындан арысында экономика ёсюуюне къошакъ мадарчады.
Сёлешиулерини чеклеринде экспертле ырахат жашау болумланы къурауда шёндюгюлю амалланы туура этедиле – архитектура оноула, ландшафт дизайн эмда инфраструктураны айнытыу бла байламлыланы. Лекторланы араларында Россейде бла тыш къыраллада ишлерин бардыргъан архитекторла, урбанистле, социологла болгъандыла.
Энчи эс адамны ырахат жашау болумларына бурулгъанды, ол а эсепде инсанны эмда гражданинни кёз къарамларын къурагъаны белгилиди.
«Ол ишни эсеби Россейни регионларында эм жетишимли проектлени сингдириудю. Къабарты-Малкъарны келечилерини къауумунда мени бла бирге «Адамгъа архитектура» программаны майданында ишге Тырныауузну администрациясыны таматасы Афашокъаланы Азамат, Нальчик шахарны баш архитектору Аслан Бидов, республиканы къурулуш эм ЖКХ министрини къуллугъун толтургъан Андрей Журавлёв да къатышханлары къууандыргъанды.
Биз дагъыда Сбер Ситиде болгъанбыз, анда жангы шахар болумланы эм иги сынамлары эмда архитектура оюмлары бла шагъырейленнгенбиз. Сёз тыш жасаланыуну, тийрелени тапландырыуну эмда транспортну бла ЖКХ-ны инфраструктурасыны юсюнден барады.
Оюмланы асламысы бизни шахарланы бла районланы тапландырыу планлада жерлерин табарыкъларына ийнанама», – деп жазгъанды КъМР-ни Башчысы кесини телеграм-каналында.
