Россейни илмула академиясыны Къабарты-Малкъарда илму арасында (КБНЦ) ётген жыйылыуда регионда илму-жамауат башламчылыкъланы юсюнден сёлешиннгенди. Аны чеклеринде бу ара, Тау эмда тау этекледе терек бахчачылыкъ институт, сора Черек районну администрациясы келишим этгендиле.
Илму учрежденияны башчысы Залимхан Нагоев, биринчиден, къонакъланы араны жетишимлерини кёрмючюне элтгенди. Ызы бла кенгешни баш темаларын туура этгенди: регионну экономикасын айнытыу, табийгъат байлыкъланы къоруулау, экологияда, эл мюлкде, информациялы системалада шёндюгю технологияланы сингдириу. Археология тинтиуле, Черек районну маданият хазнасын сакълау да магъаналы болгъанларын чертип, КБНЦ-да жарашдырылгъан 3D-технологияла археология эсгертмелени сыфатларын электрон халда жарашдырыргъа, кеслери да жарыкъландырыу ишледе кенг хайырланыргъа боллукъларын билдиргенди.
Залимхан Нагоев Черек районну келечилери бла алгъын тюбешиуледе арада байламлыкъла жюрютюрге келишгенлерини юсюнден сагъыннган эди. Ол башламчылыкъ а КБНЦ-ны башчысыны орунбасары, районну депутаты Уяналаны Кязимден чыкъгъанды.
Районну башчысы Къулбайланы Алан, туризмни айныуу бизни регионнга магъаналы болгъанын айтып, илму тинтиуле, маданият-жарыкъландырыу ишле, учрежденияда жарашдырылгъан бир-бир затла да муниципалитетге кёп жаны бла хайырлы боллукъларын белгилегенди.
Башында сагъынылгъан институтну башчысы Фатимат Темботова да, бирлешип, проектлени тамамлаугъа аланы жанындан сейир болгъанын билдиргенди, сора тас бола баргъан жаныуарланы санын кёбейтиуде этилген мадарланы юслеринден хапарлагъанды. Сёз мында леопардны, кийик эмда къашха эчкилени юслеринден барады. Кавказ заповедникге тогъуз жылны ичинде тамгъалы киштикледен онекисин жибергендиле, эчкилени саны уа эки кереге окъуна кёбейгенди.
Уяналаны Кязим да бирге ишлеуню, араны аспирантурасында билим алыуну, ДНР-де бла ЛНР-де илму байламлыкъланы кючлендириуню юслеринден хапарлагъанды. КБНЦ-ны Эл мюлк институтуну башчысы Магомед Жекамухов а, аграр бёлюмде шёндюгю технологияланы хайырланыуну къыйматлылыгъын туура этип, Черек районну бу жаны бла иги онглары болгъанын чертгенди.
Улбашланы Мурат
хазырлагъанды
