Россейни Сюд приставларыны федерал службасыны КъМР-де Управлениясыны Черек  районда бёлюмюню башчысы ич къуллукъну капитаны Башийланы Мустафаны жашы Юсюп РФ-ни Президентини Указы бла «Россей Федерацияны сыйлы сюд приставы» деген атха Къабарты-Малкъарда биринчилени санында тийишли кёрюлгенди. Ол бёлюмге башчылыкъ этгенли 11 жылдан артыкъ болады, сюд приставланы тизгинлерине къошулгъанлы уа – 25 жыл чакълы бир. 
Юсуп Мустафаевич Черек районну приставларына таматалыкъ  этгенли бёлюм иги кёрюмдюле болдургъанды, жетишимлери тутхучлудула. Аны къураучу хунерини хайырындан а черекчиле «КъМР-де УФССП-ны эм иги бёлюмю» деген эришиуледе бир ненча кере  хорлагъандыла. 
Башийланы Юсюп ишин сюйген, билген адамды. Анга уа ол ведомстволу саугъала бла кёп кере белгиленнгени да шагъатлыкъ этеди: «ФССП-гъа – 10 жыл», «ФССП-ны ветераны», «Сюд приставланы институту къуралгъанлы – 150 жыл» эмда «Къуллукъ этгени ючюн» белгини юч даражасы. Дагъыда ол КъМР-ни Правительствосуну Сыйлы грамотасы, КъМР-ни Парламентини Председателини Ыразылыгъы бла да белгиленнгенди. 
Ишде жетишимлери бла бирге Юсюп Магомедович ариу юйюрню да  башчысыды. Юй бийчеси Асият Булаховна бла юч сабий ёсдюредиле. Къызлары Мадина фортепианода согъады,  ол, «Хрустальная звёздочка» ведомстволу фестивальгъа къатышып, алчы жерге чыкъгъанды. Жашла Мухаммад бла Мусса футбол ойнайдыла, аны бла бирге чыгъармачылыкъны да сюедиле. Ала да, приставла бардыргъан тюрлю-тюрлю конкурслагъа къатышып, иги кёрюмдюле болдурадыла. 
Сюд приставланы федерал службасыны КъМР-де Управлениясында Башийланы Юсюпге хурмет уллуду. «Битеу коллективни атындан анга сайлагъан усталыгъына кертилиги, билимлилиги эм инсанлыкъ оюмлулугъу ючюн ыспас этебиз. Мындан ары да жетишимле, саулукъ, юйюрюне  ырахатлыкъ тежейбиз», – дегендиле бизге ведомстводан.

Тикаланы Фатима хазырлагъанды.