Тюнене Москвада РФ-ни Правительствосуну Председатели Дмитрий Медведев Россейни Президентинде Стратегиялы айныу эмда миллет проектле жаны бла советни президиумуну жыйылыуун бардыргъанды. Аны ишине видеоконференция халда КъМР-ни Башчысы Казбек Коков да къатышханды.
Кенгешде «Халкъла аралы кооперация бла экспорт», «Ишни хайырлылыгъы эмда иш бла жалчытыугъа себеплик этиу», «Гитче эмда орталыкъ предпринимательство эмда энчи предпринимательлик башламчылыкълагъа себеплик этиу» деген миллет проектлени жашауда бардырыуну амаллары сюзюлгендиле.
Премьер-министр бюдждет ахчаны ол не затха бёлюннген эсе да, анга къоратылырына контроль этиуге, ахчаны алыуну низамын эмда аланы керекли жерге жетдириуню болжалларын сакъларгъа кереклисине энчи эс бургъанды. «Къыралыбызда ол бек магъаналы иш, бизни да жууаплы борчубуз болгъаны баямды, аны себепли миллет проектлени толтурууну жорукъларын бузгъанла къаты жууапха тартыллыкъдыла, ол санда уголовный жууапха да»,-деп чертгенди Дмитрий Медведев.
Министерстволаны бла ведомстволаны башчыларына ахчаны заманында къоратмай, ишни созуп тургъанланы, белгиленнген жумушланы тохташдырылгъан кезиуге тамамламагъанланы юслеринден Генеральный прокуратурагъа билдирип турургъа буюрулгъанды.
Къабарты-Малкъарда «Халкъла аралы кооперация бла экспорт» миллет проектге кёре тёрт программа жарашдырылгъандыла. Ала АПК-ны, промышленностьну продукциясын тышына сатыу, халкъла аралы кооперацияны айнытыу бла байламлыдыла. Программалада белгиленнген кёрюмдюлеге жетер ючюн тышында сатыллыкъ эл мюлк продукция чыгъарыр мурат барды. Къыралдан этилген болушлугъ а 2024 жылгъа гитче эмда орта бизнесни къауумундан экспортёрланы санын иги да ёсдюрюрге онг берликди.
Энчи предпринимательлик башламчылыкълагъа болушлукъгъа уа республикада беш регион проект жашауда бардырылады. Ала бизнесни бардырыуну болумларын игилендириу, гитче эм орта предпринимательство бла кюрешгенлеге болушлукъну кенгертиу, фермерлеге грантла бериу системаны къурау, элледе кооперацияланы айнытыу бла байламлыдыла.
«Гитче эм орталыкъ предпринимательство» миллет проектге кёре, 2019 жылны башындан бери ууакъ бизнес бла кюрешген 50-ден артыкъ субъект 193 миллион сом багъасы болушлукъ алгъандыла. Анга уа регион гарантиялы фонд себеплик этгенди. Субъектлеге гитче кредитле бериуню фонду уа жылны башындан бери 57 миллион сомдан асламгъа 55 ёнкюч бергенди.
Регионланы «Ишни хайырлылыгъы эмда иш бла жалчытыугъа себеплик этиу» миллет проектни толтуруугъа къошууну графигине тийишлиликде Къабарты-Малкъар 2022 жылда конкурс сайлаулагъа къатышыргъа умут этеди, аны ючюн бек иги сынауланы бла амалланы да хайырланырыкъды.