Нальчикде озгъан ыйыкъда «Адамны чархыны 21 ёмюрде саулугъу» Битеуроссей илму-сынам форум бардырылгъанды. «Астра-Сфера» илму-излем – медицина институтда ётген жыйылыугъа КъМР-ни Саулукъ сакълау, Жарыкъландырыу эмда билим бериу министерстволарыны, Росздравнадзорну бизни республикада бёлюмюню келечилери, сора медицина, биотехнология, реабилитация эмда курортология жаны бла специалистле къатышхандыла.

Москваны, Санкт-Петербургну, Къазанны, Тёбен Новгородну эм талай башха шахарны илму-излем, билим бериу эмда медицина учрежденияларыны экспертлери форумну кезиуюнде саулукъну кючлендириу, узакъ жашау этиу, ракдан багъыу, спортда генетика энчиликле бла байламлы магъаналы темаланы сюзгендиле.

Форумгъа къатышханлагъа ол бир бирлерини сынамлары бла шагъырейленирге, къыйматлы юлгюлени сюзерге, адамланы саулукъларын кючлендирирге себеплик этерик магъаналы оноула этерге онг бергенди.

Улбашланы Мурат хазырлагъанды.