Тырныауузда  Юйюрню, сюймекликни эм кертичиликни кюнюн хар замандача къууанчлы  халда белгилегендиле. Къулийланы Къайсын атлы маданият юйде ол кюн хауа да байрамлы болгъанча эди. Таныш болмагъанла окъуна ышара саламлаша, алгъышлай эдиле бир бирлерин. Быйыл бу аламат байрамны  маданият юйню харкюнлюк жашаууна тири къатышхан сабийлени юйюрлерине жоралагъандыла.

 Къууанчлы ингирни Къулийланы Къайсын атлы Маданият юйню таматасы Бауаланы Аминат ачханды. Ары келген аталаны бла аналаны байрам бла алгъышлай, юйюрлерине - насып, сюймекликлерине - жылыу, кертичиликлерине да кюч тежегенди.

-Маданият юйню жашаууна  тири къатыша, бизни бла бирликни  къураялгъансыз. Сизни балаларыгъызны хар бирини атларын, къылыкъларын да билебиз. Жашауларыны жартысын ала  бизни кёз аллыбызда бардырадыла. Керти да, юлгюге айтырча,  саулукълу, низамлы тёлю ёсдюралгъаныгъыз ючюн  сизге уллу хурмет этебиз, -дегенди ол.

Уллу концертде жырла бла тепсеуле бир бирлерин алыша, ингирге аламат хал бергендиле. Жаш артистлени фахмуларына аланы  аталары бла аналары ёхтемленип, къууанып да къарай эдиле. Ала сабийлерини  маданият жашауларында биргелерине болуп, эришиулеге, байрамлагъа болсун,  башха шахарлагъа  да жюрюйдюле. Устазлагъа бла Маданият юйню ишчилерине ол  уллу болушлукъду, билекликди.

Артистле, къауумла, ансамбльле да кеслерини эм аламат номерлери бла чыгъа эдиле сахнагъа. Байрам концертни бардыргъан Ёзденланы Танзиля аталаны бла аналаны алгъышларгъа Тырныаууз шахарны сыйлы келечиси, кёп сабийли юйюрню огъурлу атасы, аламат аппа  Ботталаны Ибрахимни чакъыргъанды. Аны туудукълары да Маданият юйню кружокларына жюрюйдюле. Ботта улу жыйылгъанланы жюрегинден алгъышлай, кесини Орта Азияда ётген сабийлигин эсгергенди. Ол заманда быллай онглары болмай ёсген сабийлени атларындан  бюгюнлюкде жаш тёлюню маданият жашаугъа тири къатышыргъа чакъыргъанды.

Ол кюн жыйырма юч юйюрню махтау къагъытла бла саугъалагъандыла. Хар бирине жюреклени теренинден келген ариу алгъышла айтылгъандыла.

Концертни кезиуюнде «Салам»  миллет тепсеулени юлгюлю ансамбли  тепсеулери бла байрам ингирни жарытханды. «Сопрано-плюс» креатив вокал студияны артистлерини бла Ёзденланы Танзиляны жырлары къонакъланы кёллеринде, кёп аламат сезимле туудургъандыла.

Керти да юйюрдеча, аламат ингирде атала бла анала да ыразылыкъларын билдирирге излеп,  Маданият юйню таматаларына ала  кёп ыспас сёзле айтхандыла.

Байрамны аламат кезиуюнден   бири уа  «Феникс» деген шёндюгюлю тепсеулени студиясын бошап Краснодарда университетде окъуй тургъан Виктория Пархоменкону тепсеую болгъанды.  Концерт  Къулийланы Къайсын атлы Маданият юйде бийик профессионалла ишлегенине, ары жюрюген сабийлени фахмулула болгъанларына,  юйюр да бу ызда уллу магъананы тутханына  шагъатлыкъ этгенди.

Темуккуланы Асият.