Ди гуапэ зэрыхъущи, мэкъумэш ерыскъыпхъэ къэлэжьынымкIэ унэ­тIы­ныгъэ зыбжанэм Къэбэрдей-Балъкъэр Республикэр Кавказ Ищхъэрэ федеральнэ щIыналъэм щыпэрытхэм ящыщщ. Абы теухуа хъыбар жиIащ КъБР-м мэкъумэш хозяйст­вэмкIэ и министрым и къуэдзэ Уэдыхь Тимур, щIыналъэм унафэр щызегъэ­кIуэнымкIэ IэнатIэм (ЦУР) къыщы­зэрагъэпэща эфир «занщIэм» къы­щыщыпсалъэм. 

Уэдыхьым зэрыжиIамкIэ, щIыналъэм щагъэкI пхъэщхьэмыщхьэхэм, хадэхэкI­хэм къыхащIыкI фIэIугъэхэм я бжыгъэм илъэс къэс хэхъуэ зэпытщ. Къэбгъэлъагъуэмэ, илъэс блэкIам ­къриубыдэу апхуэдэ фIэIугъэхэр зэ­рылъ банкI мелуан 353-рэ щагъэхьэзыращ ди республикэм. Ар процент 12-кIэ нэхъыбэщ, абы ипэ ита илъэсым еплъытмэ. 
Ди республикэр Кавказ Ищхъэрэ щIы­налъэм апхуэдэу щыпашэщ нартыху гъэкIынымкIи, а гъавэр къехьэ­лIэжынымкIи. Кавказ Ищхъэрэ федеральнэ щIыналъэр къапщтэмэ, абы нартыхуу къыщрахьэлIэжым и процент 40-м нэсыр Къэбэрдей-Балъкъэрырщ щагъэкIыр. АбыкIэ ди щIыналъэм япэ увыпIэр иIыгъщ: гектарым хуэзэу нартыхуу центнер 66,5-рэ къытрах. Урысейпсо мардэхэм еплъытмэ, ар процент 28-кIэ нэхъыбэщ. 
Илъэс блэкIам къриубыдэу ди республикэр къэралым хыхьэ щIыналъэхэм аргуэру пэрыт щыхъуащ пхъэщ­хьэмыщхьэхэмрэ хадэхэкIхэмрэ къахэщIыкIа фIэIугъэхэр гъэхьэзырынымкIэ. Ди деж щылажьэ мэкъумэш хо­­зяйствэ зэмылIэужьыгъуэ псоми зэ­хэту къыщрахьэлIэжащ тонн мелуа­ным щIигъу хадэхэкIрэ пхъэщ­­хьэмыщхьэрэ. Ар къэралым къыщагъэкIа апхуэдэ ерыскъыпхъэ лIэужьыгъуэхэм я Iыхьэ плIанэ мэхъу. Кавказ Ищхъэрэ щIыналъэр къапщтэмэ, Къэбэрдей-Балъкъэ­рым а унэтIыныгъэмкIэ  къыщалэжьыр мэхъу процент 63-м щIигъу. Ар узыщыгуфIыкI хъуну ехъулIэныгъэщ. 

ТАМБИЙ Линэ.