Белгилисича, жай  каникулларын  къызчыкъланы бла жашчыкъланы иги кесеги  республиканы  солуу лагерьлеринде, базаларында  ётдюредиле. Бир къауумла уа Долинскдеги  «Жулдузчукъ» сабий санаторийге  келгендиле, анда ала саулукъларын кючлендиредиле, солуйдула, тенглери бла ташынадыла, кёп жангы затла да биледиле.

Кюнлени биринде уа алагъа къонакъгъа  Россейни МЧС-ини КъМР-де бёлюмюнде къуллукъ этгенле эмда  Къыралавтоинспекторла баргъандыла эмда  от тюшюуден, къыйын болумдан къалай къутулургъа кереклисини, жолда жюрюгенде  ол неда башха белгиле нени юсюнден хапарлагъанларын айтхандыла, алай бла кёп затха юйретгендиле.

«Жулдузчукъда» жумуш этгенле бла да тийишли ангылатыу-юйретиу иш бардырылгъанды. Алагъа   отну къалай ёчюлтюрге кереклисини юсюнден айтхандыла, сабийлеге уа от ёчюлтюуде керекли  техниканы да кёргюзтгендиле. Къызчыкъла бла жашчыкъла от ёчюлтюучюлени бёрклерин, къол къапларын кийип да кёргендиле, суратха да тюшгендиле. Бек сейирлиги уа сабийлеге от ёчюлтюучю- къутхарыучу техниканы, энчи машинаны кёрюу, аны руль артында олтуруу эдиле.

-Юйретиу ишлени бардыргъанда, сабийлени билимлери ёседи. Андан сора да,  быллай дерслени къызчыкъла бла жашчыкъла  бек жаратадыла. Сабийле, абаданла да  биз юйретгенни эслеринде тутарыкъларына эмда от тюшгенде кеслерин, къатындагъыланы да  сакълаяллыкъларына, къутхарлыкъларына  ийнанырчады,-дегенди  от ёчюлтюучю инструктор  Марат Халишхов.

Тюбешиуню  Россейни МЧС-ини регион бёлюмю эмда  Къыралавтоинспекция къурагъандыла. Аланы юйретиулерине уа жетмишден аслам адам тынгылагъанды.

Холаланы Марзият.