Юйюр – жашауну тутуругъуду, дейдиле. Кертиси бла да, ол алайды. Адам улусу акъылбалыкъ болгъандан тебиреп эр киши, тиширыу болса да, чынг аллын юйюр къайгъысын этедиле. Бир бирлерин тапсала уа,  жашау жолунда таукел барадыла адамла. Бу хапарыбызда аллай бир тутхучлу юйюрню юсюнден айтайым.

Юй тамата Ёлмезланы Шыйыхны жашы Къубадийди, аны юй бийчеси Айшаланы Муратны къызы Фазикады. Быланы беш къызлары, бир жашлары барды: Айшат, Римма, Рая, Рита, Руслан. Барысыны да окъуулары, билимлери, бирер жерде юйюр къурап жашайдыла, сабийле ёсдюредиле.

Къубадийни юсюнден айтханда, ол 1941  жылда Къашхатауда туугъанды. Ол юйюрю бла Азиягъа кёчгенде, алгъа  ата юйюрю бла Къазахстанны Кокчетав областында жашагъанды. Анда школгъа барып да башлагъанды. 1950 жылда уа юйюрлери Къыргъызстаннга кёчюп, бери къайтхынчы анда тургъандыла. Къашхатаугъа уа 1957 жылда ноябрьни аягъында къайтхандыла ала.

Ол заманда Къубадий акъылбалыкъ болгъан эди. Къашхатауда  коммунхозгъа ишге тохтайды. Алыкъа усталыгъы жокъ эди, бригадир буюргъан ишлени этип турады. Элледе уа  суу тартадыла, ара мюлклеге  тюрлю-тюрлю журтла ишлейдиле. Жаш да, хайыр эте,  юйюне болуша башлайды.

Ол окъууну да унутмагъанды. Ишден сора ингир школгъа жюрюп, бир ненча  жылдан онбир классны тауусханды. Школну бошагъанына да къууанып, окъуугъа кирейим деп тургъанлай, аны аскерге чакъырадыла да, ол къыралны аллында инсан борчун толтурургъа кетеди.

Алгъа Украинаны Днепропетровск шахарына тюшеди. Анда сержантла хазырлагъан школну бошайды. Андан сора аны Белоруссияны Барановичи шахарына кёчюредиле. Анда авиация  полкда самолётланы  учаргъа хазырлагъан бёлюмюнде беш жыл къуллукъ этгенди Къубадий.

Жашау жолуна аскерчиликни сайлар акъылы бар эди аны. Алай ол кезиуледе анасы къаты ауруйду да, военкоматны юсю бла жашны юйге чакъыртадыла. Келгенлей окъуна Къашхатауда эл мюлк техника организациягъа ишге тохтап, инженер болуп, анда эки жыл ишлейди.

Ызы бла  район больницагъа  терк болушлукъ этген бёлюмюне шофёр болуп ишге тохтайды. Анда отуз эки жыл уруннганды. Ол жылларын Къубадий былай эсгереди:

- Адам сюйген ишин этсе, аны кесине, тийресинде адамлагъа да хайыры  болады. Больницада ишлеген заманымда кёп адамгъа болушургъа тюшгенди – халкъ болгъан жерде ауругъан болады. Анга уа  терк болушлукъ этерге керекди. Машинам хар заманда хазыр эди  докторну саусузгъа  элтирге. Бирде уа тау жайлыкълагъа чыгъаргъа окъуна тюше эди. Бир саусузгъа барып, анга болушлукъ этип къайтсакъ, врачладан эсе кесими бек къууаннган суна эдим.

Къубадий машинасына да иги къарагъанды. Бузула тургъан жерин кёрсе, олсагъатлай анга ремонт этдирмей къоймагъанды. Улоуун  ышанырча этмей, жолгъа бир да чыкъмагъанды, жолда тынч, терк да барыргъа тюшгени ючюн.

Къубадий больницада ишлеген врачланы атларын хурмет бла эсгереди, ол санда Къарчаланы  Хусейни, Чаналаны Абдулланы, Къоркъмазланы Людмиланы. Ала тамата врачла болуп ишлегендиле, усталыкълары бийик, сёзлерине тынгылатхан оноучула. Аладан сора да, Мокъаланы Жанхотну, Мусаев Халисни эм башхаланы хурмет бла сагъынады ол, билимлиле, иш кёллю докторла эдиле деп.

Больницада отуз эки жыл ишлегенден сора Ёлмез улу Къашхатауну администрациясыны башчысы Ажоланы Ахматны да эки жыл жюрютгенди. Элим ючюн деп кюрешген адам эди деп, аны да бек махтайды ол.

Бюгюнлюкде уа Къубадий ишни къоюп юйдеди. Юйдегиси Фазика бла ёсдюрген къыз-жашха, аладан туугъанлагъа къууана жашайды.Сабийлери да аталарына, аналарына ушап, иш кёллюле болуп ёсгендиле.

Къубадий къайда, къаллай жерде ишлеген эсе да, атын иги бла айтдыргъанлай тургъанды. Анга шагъатдыла майдаллары  бла махтау къагъытлары да. 

Ёлмез улу элде, жамауатда да намысы, сыйы жюрюген адамды, юйдегиси да  хар заманда къатында  анга билеклик этип тургъанды. Къубадий бла Фазика бир бирни ангылап, элли жылдан артыкъ бирге жашайдыла. Хау, тынч, къыйын кюнле да болгъандыла жолларында. Алай инсан тюнгюлмегенлей, юйюр, жамауат борчун толтурса, итиниулюгюн тас этмегенлей, башхагъа да кёл этдиралса, ол тюйюлмюдю керти насып.

Османланы Хыйса