2025 жылда 4 июльда Яникойну Маданият юйюнде «Юлгюлю бахча 2025 жылда» деген конкурсну эсеплери чыгъарылгъандыла. Аны башланыу кезиую, излемлери да быйыл апрельде белгиленнген эдиле. Эришиу Яникой бла Каменка элледе 17 жыллары толмагъан жашланы бла къызланы араларында бардырылгъанды эм апрельден июльгъа дери сабийле бахчаларына тынгылы къарап эришгендиле. Аны юсюнден бизге штатда болмагъан корреспондентибиз Кючмезланы Айза билдиргенди.
«Юлгюлю бахча 2025 жылда» деген конкурсда жюриге Хаджиланы Сулеменни жашы Хасан таматалыкъ этгенди. Аны болушлукъчулары уа Элеккуланы Хасан хажи  бла Кансаланы Мурат болгъандыла. Хорлагъанлагъа дипломла, майдалла эм ахча саугъала берилгендиле. 

Биринчи жерни Чыгырланы Ислам алгъанды, экинчи Таймаскъулланы Ислам болгъанды, ючюнчюню уа Жаболаны Зухура бла Этезланы Алан юлешгендиле. 

Биринчи жерлеге тийишлилени сайлар ючюн, жюриге киргенле бир ыйыкъ алгъа конкурсха къатышыргъа сюйгенлени барысыны да бахчаларына къарап чыкъгъандыла.  

«Юлгюлю бахча» деген эришиу жаш адамланы араларында биринчи кере бардырылгъанды. Болсада ол кюч ала барлыгъы даулашсызды. Аллай затла тау элледе жашагъан сабийлени, таматаланы да бирлешдирирге, кёллендирирге болушадыла.  Ол дагъыда жаш тёлюню иш кёллюлюгюн, къара ишден да артха турмазлыкъларын кёргюзтгенди. Аллай сабийле ёсдюрген ата-аналагъа да ыспас этерчады. 

Бу эришиуге эм  кёп тюрлю башха конкурслагъа да уллу къыйын салгъаны, элни жаш тёлюсюне энчи къайгъырыуу болгъаны ючюн Элеккуланы Хасан хажиге уллу ыспас этерчады. Элин, миллетин сюйюу аз затдан башланады. Аллай къайгъырыуун Яникой элни иймамы кюн сайын шартлагъанлай турады. 

Конкурсха къатышханланы, анда биринчи жерлени алгъанланы да алгъышлайбыз. Келир жылда быллай эришиуге андан да аслам жаш тёлю къатышырыгъына ийнанабыз.