Юч кюнню ичинде Нальчик шахар округда, Россейни МЧС-ини Баш управлениясы къурап, МЧС-де къуллукъ эте тургъанланы эмда мындан ары жашауларын от ёчюлтюу, къутхарыу иш бла байламлы этерге сюйгенлени араларында регионла аралы эришиуле бардырылгъандыла. Алагъа къатышыргъа Чечен Республикадан, Къарачай-Черкесден, Ингушетиядан, Север Осетия-Аланиядан, Дагъыстандан, Ставрополь крайдан да командала къатышхандыла. Жашла бла къызла Шимал-Кавказ федерал округну от ёчюлтюу-къутхарыу жаны бла спортдан федерациясыны кубогу ючюн кючлерин, къарыуларын, тириликлерин, билимлерин да сынагъандыла.

Эришиуле бошалгъандан сора, хычыуун жумуш да къуралгъанды. Ары сыйлы къонакълача КъМР-ни Парламентини жамауат советини члени Газаланы Масхут, ЛДПР партияны депутаты, координация советни председателини орунбасары Александр Гедугошев, ЛДПР-ни Нальчик шахар округда координатору Ирина Гедугошева чакъырылгъан эдиле. Ала СКФО-ну кёп регионларындан келген, эришиулеге къатышхан жашланы бла къызланы къызыу алгъышлагъандыла, майдалла, грамотала эмда ЛДПР-ни атындан саугъала да бергендиле.

Саугъалагъа эришиулени бийик даражада къурагъанла эм бардыргъанла да тийишли болгъандыла.

Къонакъбайла республикагъа эришиулеге къатышыргъа келген къутхарыучулагъа ыспас этгендиле, кёп махтау сёзле да айтхандыла.

- Быллай тюрлю эришиуле жашчыкъланы, къызчыкъланы да спортда, жашауда, тутхан ишлеринде да бийик жетишимлеге жетерге себеплик этедиле, аны бла бирге тигзинлиликге, кючлюлюкге да юйретедиле. ЛДПР партия уа жаш тёлюню айнытыу жаны бла ишни къолгъа эртте алгъанды эмда аны къаллай башламчылыгъында да къатындады, къолундан келген болушлукъдан артха турмайды, алай бла МЧС-де къуллукъ этгенле ишлерин тынгылы бардырыуда, тамамлауда да кесини тийишли юлюшюн къошады, - дегенди бизге Газаланы Масхут.

Холаланы Марзият.