КъМР-де Миллетлени ишлери эм жамауат проектле жаны бла министерствосу къурап, бу кюнледе Минги тауну тийресинде Къабарты-Малкъар къырал университетни солуу базасында абадан классланы окъуучуларыны юйрениу лагери бардырылгъанды. Анга республиканы битеу районларындан, шахарларындан, эллеринден да жюзге жууукъ жаш бла къыз къатышхандыла. Тёрт кюнню ичинде ишлеген миллетле аралы «Эльбрус-2025» лагерьде жаш адамла бир бирлери бла танышхандыла, кеслерине жангы шуёхла тапхандыла.

Дагъыда лагерьни кезиуюнде алагъа Миллетлени ишлери эмда жамауат проектле жаны бла министерствода ишлегенле «Къабарты-Малкъар Республикада къырал миллет политиканы эмда жамауат проектлени жашауда бардырыу» деген программаны юсюнден хапар айтхандыла. Жаш адамла кеслери ол жаны бла да оюмларын билдиргендиле.

Лагерьни баш борчу тюрлю-тюрлю миллетлени эмда динлени, культураланы жюрютгенлени араларында бир бири бла шуёхлукъда, ангылаулукъда жашарча этиуге бурулуп эди да, ол борч тынгылы тамамланылгъанды, деп шарт айтыргъа боллукъду. Ол мамырлыкъда эмда бир бирни ангылаулукъда жашауну къураугъа этилген магъаналы атлам болгъанды.  

Аны ючюн деп лагерьни программасында тюрлю-тюрлю тренингле къуралгъандыла, алада жаш адамла бир бирлери бла шуёхлукъну къалай къураргъа, танышыргъа, командада ишлерге, дагъыда алагъа ушаш затлагъа юйреннгендиле, мастер-класслагъа къатышхандыла. Битеу ол затла жаш адамлагъа кеси кеслерине ышаныргъа, этген муратларына жетер ючюн, алгъа таукел барыргъа юйренирге онг бергендиле.

Лагерьде тургъан кюнлеринде, юйрениуледен сора да, тюрлю-тюрлю ингирле, спорт оюнла, сейирлик адамла бла тюбешиуле, жолоучулукъла эмда канат жол бла «Минги таугъа» ёрлеу да болгъандыла.

Ахырында уа юйрениу лагерьге къатышханлагъа сертификатла, саугъала да бергендиле.

Миллетле аралы «Эльбрус-2025» лагерьге Хасанияны 16-чы номерли орта школуну окъуучулары Холаланы Далхат бла Этезланы Камилла да барып аны ишине тири къатышхандыла. Кюз артында школгъа келселе уа, ала лагерьде тургъан кюнлеринде алгъан билимлеринден, сынауларындан да шуёхларына, бир класслыларына да юлюш этерикдиле.

Холаланы Марзият.