«Тэрч» къэзакъ тIасхъэщIэх гупым дыгъуасэ иратыжащ абы хэтхэм ябгъэдэлъ зауэ зэ­фIэкI лъагэхэм къапэкIуа къэрал фIыщIэм щыхьэт техъуэ Бэракъ лъапIэр. УФ-м и Президент Путин Владимир и IэщIэдзыр зытелъ, апхуэдэуи «Тхьэр фщIыгъущ» псалъэхэр зыт­ритха а ныпыр зауэлIхэм щратыж зэIущIэм хэтащ УФ-м и Президентым и полномочнэ лIы­кIуэу Кавказ Ищхъэрэ федеральнэ щIыналъэм щыIэ Чайкэ Юрий, КъБР-м и Iэтащхьэ КIуэкIуэ Казбек, адрей щIыналъэхэм я уна­фэщIхэр.

Апхуэдэ гулъытэмрэ псалъэхэмкIэ къэралым и пашэм фIыщIэ яхуищIащ «Тэрч» къэзакъ тIасхъэщIэх гупым хэтхэм, яхэлъ хахуагъэм папщIэ, дзыхь лъагэ зэраIэр, Хэкум и пащхьэ фIыщIэ къызэрыщалэжьар къыхигъэщу. Бэ-ракъ лъапIэр «Тэрч» къэзакъ тIасхъэщIэх гупым и пашэ Гаджжиев Михаил иритыжащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий. 
ЗэIущIэм зэрыщыжаIамкIэ, «Тэрч» гупым къикIуа гъуэгуанэр гъэнщIащ текIуэныгъэ инхэмкIэ, абы хэт сэлэтхэмрэ офицерхэмрэ зэрахьэ лIыгъэмкIэ, ягъэлъагъуэ хахуагъэмкIэ. А зауэлIхэр дапщэщи щытщ зэныбжьэгъугъэ пэжым, къэ­мылэнджагъэм, зауэ зэфIэкI лъагэхэм я щапхъэу. 
Чайкэ Юрий и къэпсэлъэныгъэм апхуэдэу къыхигъэщащ «Тэрч» тIасхъэщIэх гупым и бэракъым нэгъуэщI батальон зыбжанэ - «Тэрч», «Скиф», «Каспий», «Балтика», «Гребенской», «Нормандия - Неман» топгъауэ дивизионыр - зэрыщIэтыр. А гупышхуэм щIыгъуу  Къэбэрдей-Балъкъэр Республикэм и щIалэ куэд мы зэманым хэтщ ди къэралым гъунэгъу щIыналъэм щригъэкIуэкI дзэ Iуэху хэхам. 
- Урысей Федерацэм и Президентым и IэщIэ­дзымрэ адэкIи лIыхъужьыгъэ зехьэным хуэзыунэтI и псалъэхэмрэ зытет Бэракъ лъапIэр иджыри зэ щыхьэт тохъуэ ди къэралым щыпсэу цIыхубэр зэрызэкъуэтым, абы ис лъэпкъхэм я зэхуаку зэгурыIуэныгъэ быдэ зэрыдэлъым, - жиIащ къыщыпсалъэм КIуэкIуэ Казбек. - Сигуми си псэми къабгъэдэкIыу сохъуэхъу «Тэрч» къэзакъ тIасхъэщIэх гупым хэтхэу мы зэманым къэралпсо мыхьэнэ зиIэ къалэнхэр екIуу зэ­фIэзыххэм. ФэркIэ догушхуэ, допагэ, ди зауэлI хахуэхэ, лIыхъужьхэ! ТекIуэныгъэр фи Iэрылъхьэу дынывожьэ!