Курортла эм туризм министерствону себеплиги бла Къабарты-Малкъарда триатлонну сюйгенлени араларында «Жылы-Суу Мэн» деген аты бла эришиу бардырылгъанды. Анга Россейден бла шуёх къыралладан жюзге жууукъ адам къатышхандыла.

Эм алгъа, республикабызны ариу табийгъаты къонакъланы сейирге къалдыргъанын белгилерге тийишлиди. Ала Жылы-Суугъа элтген жол жомакъдача тамаша, аны бла бирге уа спортчулагъа таплыкъгъа кереклисича къыйын болгъанын да белгилегендиле. Жолоучуланы оюмларына кёре, Россейде ол эм ариу жолладан бириди. Эришиуню чабыу кезиуюнде уа атлетле Султан чучхурну да кёргендиле, аланы жоллары Эммануэльни таласы, немис аэродром, таш жууаланы юслери бла ётгенди. Аланы жоллары Бирджалы кёлню къатында бошалгъанды, ол да эслеринде къалырча жер болгъанды.

 Эришиуню къурагъанла – «Экстрим Трейл Групп» бла Къабарты-Малкъарны триатлондан федерациясы – бу эришиу дунияда триатлондан эм ариугъа, къыйыннга да саналырына ышанадыла. Алай болса уа, ол битеу дуниядан атлетле бла туристле аслам келирине себеплик этерикди.

Кульчаланы Зульфия.