ЩIалэгъуалэм я унэм (Нал­шык къалэ дэтым) мэкъуауэгъуэм и 28-м Iэтауэ щагъэлъэпIащ ЩIалэгъуа­лэм я махуэр. Концертыр ирагъэкIуэкIащ Громов Денисрэ Благодарная Кари­нэрэ.

Концертыр Урысейм и ГимнымкIэ къызэIуаха нэужь, КъБР-м и Правительствэм   и УнафэщIым и къуэдзэ ­Къуэшырокъуэ Залым къеджащ республикэм и Iэтащхьэм щIалэгъуалэм зэры­захуигъазэ тхыгъэм. Абы итт: 
- Къэбэрдей-Балъкъэрым и щIалэгъуалэр ди къэкIуэнур зэлъытахэрщ. Хэкур егъэ­фIэ­кIуэным фи щIэныгъэмрэ зэфIэкIымрэ зэрефхьэлIэр щхьэпэщ Урысейр нэхъ къарууфIэ хъуным. Быдэу си фIэщ мэхъу республикэм зе­зыгъэужьыну жэрдэмыщIэ­хэр къызэрыхэфлъхьэнумрэ ахэр зэрывгъэзэщIэнумрэ. 
КъБР-м ЩIалэгъуалэм и IуэхухэмкIэ и министерствэм и жэрдэмкIэ, япэу къапщытащ щIыналъэм и районхэм щIалэгъуалэм яхуэгъэзауэ щащIэм къыпэкIуэр. АбыкIэ пажэ хъуахэм хуагъэфэща дамыгъэхэмрэ ахъшэ саугъэтхэмрэ иратыжащ къуажэ, район унафэщIхэм. Япэ увы­пIэр Тэрч щIыналъэм, етIуа­нэр - Май, ещанэр - Шэджэм районхэм къахьащ. Къинэ­мы­щIауэ, къэрал, жылагъуэ лэжьакIуэхэр, щIалэгъуалэ Iуэху­хэм къыхэжаныкIахэр, «Зарница 2.0» дзэ-патриот джэгукIэм щытекIуахэр ягъэ­лъэпIащ. Апхуэдэу, дзэ Iуэху хэхам хэт зауэлI 14-м фIыщIэ, щIыхь тхылъхэр иратащ, хэкупсэ гъэсэныгъэм хуащI хэлъ­хьэныгъэр къалъытэри. ЯгъэлъэпIахэм зэгъусэу су­рэтхэр зытрагъэхащ.
Дзэ Iуэху хэхам щыIэхэмрэ абыхэм я унагъуэхэмрэ зэ­радэIэпыкъум яхузэфIэкI ­халъхьэ щIалэгъуалэм. Абыхэм мазэкIэ ирагъэкIуэкIа пса­пэ Iуэхухэм республикэм исхэр жыджэру хэтащ: цIыху щхьэхуэхэм, IуэхущIапIэхэм ахъшэ зэхадзащ, яшхын, щатIэгъэн зэхуахьэсри, ди щIалэхэм хурагъэшащ. Концертыр щекIуэкI пэшым ашыч щагъэуври, мы Iуэхум щыпащащ. Зэхуахьэса ахъшэр дзэ Iуэху хэхам щыIэхэмрэ абыхэм я унагъуэхэмрэ трагъэ­кIуэдэнущ.
КъБР-м щIалэгъуалэм я IуэхухэмкIэ и министр Лу Азэ­мэт дзэ Iуэху хэхам щыIэхэм фIыщIэ яхуищIащ цIыхухэм я лъапIэныгъэ нэхъыщхьэхэр зэрахъумэм папщIэ. Абы жи­Iащ, «ЩIалэгъуалэмрэ сабий­хэмрэ» лъэпкъ Iуэхур къагъэ­сэбэпу, хабзэхэр хъумэным, нэхъыжьхэм гулъытэ яхуэ­щIыным, унагъуэхэр гъэбы­дэ­ным, республикэм зегъэу­жьы­ным теухуа Iуэху щхьэ­пэ­хэр зэрахузэфIэхынур. 
ЩIалэгъуалэм хъуэхъу гуа­пэкIэ зыхуагъэзащ Къэрал Думэм и депутат Родинэ Викторие, ЦIыхум и хуитыны­гъэр хъумэнымкIэ КъБР-м и уполномоченнэ Зумакулов Борис, КъБР-м и Жылагъуэ пала­тэм и УнафэщI Берд Хьэзрэта­-лий, КъБР-м Егъэджэныгъэмрэ щIэныгъэмкIэ и министерствэм и Жылагъуэ советымрэ Дунейпсо Адыгэ Хасэмрэ я Тхьэмадэ Сэхъу­рокъуэ Хьэутий, нэгъуэщIхэми.
Пшыхьыр ягъэдэхащ республикэм и уэрэджыIакIуэ, къэфакIуэ нэхъыфIхэм. Апэ­нэс Астемыр концертыр зэ­хуи­щIыжащ щIалэгъуалэм я гимнымкIэ.

ТЕКIУЖЬ Заретэ.