Тырныауузда Къулийланы Къайсын атлы маданият юйде школ лагерьде солугъан сабийлеге деп Ёзденланы Танзиля уллу байрам къурагъанды. 
Интерактивни кезиуюнде сабийле элберле, нарт сёзле, жомакъдан юзюкле айтып ойнагъандыла. Викториналагъа болмагъанча тири къатышхандыла. Гъаршны юсюнден билимлерин тинте, бусагъатдагъы сабийлени неден да ангыламлары иги болгъанын ачыкълагъанды бардырыучу. Сабийлени жыр  айтыуда уа фахмулары да  къууандыргъанды.
Тепсеулеге жораланнган эришиу кезиуледе сабийле,  сахнагъа чыгъып, усталыкъларын кёргюзтгендиле. Бюгюннгю  тёлю артист хунерлери, билимге итиниулери бла да къууандырады. 
Байрамны кезиуюнде лагерьни солуучуларыны кеслерин байрам бардырыучуну орунунда да сынар онглары болгъанды.  Сёлешиулери шатык,  шарт, басымланы керек  жерге сала билгенлери сабийлени школда адабиятны дерслерин  сюйюп окъугъанларын  кёргюзтгенди. Байрамгъа «Сопрано плюс», «Голос» деген вокал студияланы келечилери да  къатышып, жаш къараучулагъа концерт номерле саугъалагъандыла.
Къууанчлы байрамны ахырында барысы да бирге суратха тюшгендиле. «Жомакълы эришиу» билимни бла чыгъармачылыкъны айнытыуда аламат юлгю болгъанды. 
Темуккуланы Асият.