Къэбэрдей-Балъкъэр къэрал университетым студенту I9400-рэ щоджэ, абыхэм ящыщу мини 2,5-р хамэ къэрал 40-м къикIахэщ. Абыхэм я нэхъыбэр Индие, Тыркумэн, Африкэмрэ Хьэрып къэралхэм щыщщ.
НэгъуэщI щIыпIэхэм къикIа студент 777-рэ КъБКъУ къыщIэтIысхьэнущ 2025 гъэм, языныкъуэхэм еджапщIэр ятынукъым, языныкъуэхэм ар къыIахынущ. Хамэ къэралхэм къикIа студентхэр нэхъыбэу зыхуеджэр медицинэ, инженер-техникэ IэщIагъэхэрщ. Тыркумэным и лIыкIуэхэм къыхах хабзэр «Хэку филологие» унэтIыныгъэрщ (Урысыбзэмрэ литературэмрэ).
«Университетым мыхьэнэшхуэ ирет икIи лэжьыгъэ пыухыкIахэр ирегъэкIуэкI хамэ къэралхэм къикIа студентхэр нэхъ псынщIэу къыдэса, зыхэт гупымрэ щIыналъэмрэ хэсыхьа хъуным хуэунэтIауэ. Кураторхэри абыхэм ядоIэпыкъу, я унэ щыIэж хуэдэ къыщагъэхъуну, зыхуей-зыхуэфIхэмкIэ къызэрагъэпэщ», - жеIэ КъБКъУ-м миграцие кIэлъыплъыныгъэмкIэ и управлением и къудамэм и унафэщI Дыгъужь Алинэ.
Абы и псалъэм щыхьэт тохъуэ хамэ къэралхэм къикIа студентхэри икIи къыхагъэщ КъБКъУ-м и егъэджакIуэхэр фIыуэ къазэрыхущытыр, ди цIыхухэр зэрыжумартыр, республикэм и щIыпIэхэр зэрыдахэр.
«КъБКъУ-м программэ зэмылIэужьыгъуэхэр щолажьэ, удэзыхьэх унэтIыныгъэмкIэ щIэныгъэ куу зэбгъэгъуэтын щхьэкIэ Iэмалхэр псори щыIэщ. ЕгъэджакIуэхэм сепсэлъылIэну, я чэнджэщхэр зэхэсхыну си дежкIэ лъапIэщ», - жеIэ Анголэм щыщ Мэз Рональдо.
Бурундим щыщ Жаннэ Козетт Буренгенгвэ ятхьэкъуащ Къэбэрдей-Балъкъэрым и щIыпIэ дахэхэм икIи фIэхьэлэмэтщ ди щIыналъэм щыпсэухэр сыт и лъэныкъуэкIи къадэIэпыкъуну зэрыхьэзырхэр.
«СыщIегъуэжакъым КъБКъУ-р къызэрыхэсхам икIи си гъащIэм и Iыхьэ лъапIэхэм ящыщу къызолъытэ мыбы щызгъакIуэ зэманыр. ЩIэныгъэ куу зэзыгъэгъуэтыну хущIэкъу дэтхэнэ зыри къыхузоджэ мы университетыр къыхахыну», - къыхегъэщ гуапэу Сьеррэ-Леонем къикIа Бримэ Канех.
«Ди деж къыщIэтIысхьэ студентхэр япэу зыIууэ гугъуехьхэм ящыщщ ди бзэхэр, ди щыIэкIэ-псэукIэхэр зэрызэтемыхуэр. Урысыбзэр зымыщIэу къэкIуахэм Iэмал яIэщ КъБКъУ-м Дунейпсо егъэджэныгъэмкIэ и Школ нэхъыщхьэм щIэтIысхьэным щыхуагъэхьэзыр и къудамэм илъэскIэ щеджэну, бзэр зрагъэщIэну, къыхаха унэтIыныгъэмкIэ дерсхэми зыщагъэгъуэзэну. Ар къызэраухыу урысыбзэм зэрыхуеджам щыхьэт техъуэ сертификатхэр ират, зыхуеджэну къыхаха унэтIыныгъэхэм иужькIэ щIотIысхьэж», - жеIэ Дыгъужь Алинэ.
КъБКъУ-м и Медакадемием урысыбзэр зымыщIэ и студентхэр инджылыбзэ программэкIэ ирагъаджэ. Зэрыхабзэу, ахэр Индием къикIахэрщ.
Къыхэгъэщыпхъэщ КъБКъУ-м щIэтIысхьэн щхьэкIэ хамэ къэралым къикIа студентхэр дыдейхэм ныкъуэкъуэгъу къазэрыхуэмыхъур, ахэр зэхьэзэхуэхэм зэрыхэмытыр. Абыхэм я тIысыпIэр Урысей Федерацэм и Правительстэвэм щхьэхуэу квотэкIэ къахуеутIыпщ, я еджапщIэхэри къэрал бюджетым къыхокI. КонтракткIэ щIэтIысхьэхэми я Iуэхур апхуэдабзэщ - а IэмалымкIэ еджэхэри щхьэхуэщ. Хамэ къэралхэм къикIахэм щхьэкIэ къызэрыхах зэхьэзэхуэхэр щхьэхуэу ирагъэкIуэкI.
ХЬЭЩОКЪУЭ Алыдж.
