Къэбэрдей-Балъкъэрым мы махуэхэм щыIэщ «Альманах. Образы мира. Адыги» хэзыгъэгъуазэ проектым и тхьэмадэ, лъахэхутэ, тхакIуэ цIэрыIуэ Осташкэ Андрей зи пашэ, Кърым ­Республикэм и къалэ зэмылIэужьы­-гъуэхэм щылажьэ журналистхэр зыхэт гупыр.

ЗекIуэ гъуэгуанэ зэдытехьахэр япэу къыщыувыIар, ди лъэпкъэгъухэр куэду зэрыс щIыналъэхэм ящыщу, Адыгэ Республикэ хэгъэгуращ. ШыщхьэуIум и 9-м къыщегъэжьауэ, гупыр абы зэры­щы­хьэщIа махуитхум къриубыдэу къуажэ    14-м щыIащ, зыхуэзахэм ноби зэрахьэ, тхыдэм и щIэину къытхуэна ди щэнхабзэм, хабзэ-бзыпхъэ дахэхэм щыгъуазэ зыхуащIащ.
КъыкIэлъыкIуэ лъэбакъуэу Осташкэ Андрей зи пашэ лъахэхутэ гупым Къэ­рэшей-ШэрджэсымкIэ яунэтIащ. Ахэр кIуащ Хьэбэз районым хыхьэ къуажэ зыбжанэм, абыхэм дэс нэхъыжьыфIхэм ­яIущIащ, къаIуэтэжа хъыбарыжьхэр ятхащ, щIыпIэ дахэхэм фильм трахащ.
Кърымым къикIа журналистхэр ди республикэм шыщхьэуIум и 18 лъандэрэ щыIэщ. ХьэщIэхэм зыщрагъэгъэпсэхуащ хьэрычэтыщIэ Къущхьэ Роберт и IуэхущIапIэу Аушыджэр псы хущхъуэхэм я Iэшэлъашэм щыIэм, Шэрэдж псыхъуэм абдежым щынэхъ лъагэ бгым дашащ, ­Iэгъуэблагъэр кърагъэплъыхьащ, щIы­пIэцIэхэр, абыхэм япыщIа хъыбарыжь-хэр ирагъэтхащ. КъыкIэлъыкIуэ махуэм гупыр Зеикъуэ къуажэм кIуащ. ИкIи, жылагъуэ лэжьакIуэ Быф Арсен и жэрдэмрэ и мылъкукIэ, абы и гъунэгъуу щызэхаша тхьэлъэIу-теплъэгъуэ дахэм, шыгъажи джэгуи зыхэтам, хьэщIэхэм я нэгу зыщрагъэужьащ, кинокадрхэр тры­рагъэхащ.
Къэбэрдей Адыгэ Хасэм и тхьэмадэ, «Адыгэ псалъэ» газетым и редактор нэхъыщхьэ ХьэфIыцIэ Мухьэмэдрэ Дунейпсо Адыгэ Хасэм и унафэщIым и къуэ­-дзэ НэщIэпыджэ Замирэрэ Кърымым ­къикIа лъахэхутэхэм Налшык къалэ шыщхьэуIум и 20-м щаIущIащ. НэгъуэщI щIыпIэхэм щыпсэу журналистхэр адыгэ­хэм ди щэнхабзэм, тхыдэм щIыдихьэхар тфIэтелъыджэу дыздэщысым, Осташкэ Андрей жиIащ:
- Кавказым ис лъэпкъхэм сызэ­ры­цIыкIурэ сфIэгъэщIэгъуэну сакIэлъоплъ, я щэнхабзэм щыгъуазэ зызощI. Тхыдэ жыжьэм къызэриIуэтэжымкIэ, Пасэрей Киевым къегъэщIылIа Урысейм и лъэхъэнэхэми адыгэхэр дэнэкIи къыщацIыхуу щытащ. Фи лъэпкъым и щэн нэхъыщхьэр, дуней хущытыкIэр щызэгъэуIуа Адыгэ Хабзэр ноби фи деж щолажьэ, языныкъуэхэм ар «жьым ип­хъэхыжауэ» жаIэ пэтми. Уеблэмэ, «Адыгагъэм» и сэбэп зэкIыу щытари ноби щхьэпэ зыхуэхъуфынури Кавказым ис лъэпкъхэм я закъуэкъым, атIэ, дэ дызэ­реплъымкIи, ар мэув нэгъуэщI щIыналъэхэм щыпсэу цIыхухэм я дежкIи псэкупсэм и джэлэс нэсхэм ящыщу, - къыхигъэщащ къэкIуахэм я нэхъыжьым.
ХьэфIыцIэ Мухьэмэд хьэщIэхэм яхуэ­упсащ зыпэрыт Iуэхум къащыхуэсэ­бэ­пыну дэфтэрхэр зэрыт тхылъ зыбжа­нэ-кIэ, къэкIуэну махуэхэм ялэжьынумкIи чэнджэщ яритащ.