Малчылыкъда уруннганла быйыл ал беш айны ичинде он процентге аслам тууар эмда тауукъ эт (сау ауурлукъда) чыгъаргъандыла. Аны бла бирге ийнеклени (+1,8%), юй къанатлыланы (+0,3%), къойланы бла эчкилени (+6,7%) саны да ёсгенди. Тауукъ жумуртхала да кёбюрек болгъандыла; аладан бу кезиуде былтырдан эсе 3,5 процентге аслам жыйгъандыла. Бу шартла эл мюлкде болум иги болгъанын ачыкъ кёргюзтедиле, дегендиле КъМР-ни Эл мюлк министерствосунда.

Автобусла тохтаучу жерле жарашдырыладыла

 Нальчикде шахарны инфраструктурасын жангыртыу ишле барадыла. Бу кюнледе талай орамда автобусла тохтаучу комплекслени тап халгъа келтире турадыла. Битеу да 26 павильон орнатыллыкъды, ала шёндюгю излемлеге келишген, тынгылы, къоркъуусузлу объектле боллукъдула.

Жолла жангыртыладыла

Нальчик-Майский жолну 3,6 - километрлик кесегинде тынгылы жангыртыу ишле барадыла. Бу объект «Жашау этиуге тийишли инфраструктура» миллет проектни чеклеринде тамамланырыкъ жумушланы тизмесине киреди.

Шёндю жолну ол кесегинде темир жолгъа къошулгъан жерин жангыдан жарашдыра турадыла, дагъыда кёпюрге бетон саладыла, бордюр ташланы орнатадыла, геодезия тинтиуле бла кюрешедиле. Кёп да бармай жангы асфальтны жайып башларыкъдыла. Хар нени да бу жайны ахырына тамам этерге дейдиле.

Улбашланы Мурат.