Озгъан ыйыкъда Басхан шахарда «Бирге жашаргъа!» деген уллу фестиваль озгъанды. Ол республиканы кёп миллетлерин бла тюрлю-тюрлю жыл санлы адамланы бирикдиргенди. Халкъла араларында байламлыкъны кючлендирген майдан болгъанды бу проект.
Анга Басхан, Элбрус, Прохладна районланы администрацияларыны къуллукъчуларын, билим бериуде ишлеген таматаланы эм сабий садланы келечилерин чакъыргъандыла. Басхан шахарны администрациясыны биринчи орунбасарыны къуллугъун болжаллы халда толтургъан З.Х. Архагова, билим бериу департаментни таматасы М.М. Буранова, 4-чю номерли прогимназияны таматасы, устазлары, юйретиучюлери да сабийлени биргелерине башха районладан келген къонакълагъа ариу тюбегендиле. Эрттегили миллет оюнлары, тепсеулери бла да байрамны башланыуун жарыкъ этгендиле.
– Бу фестиваль бизни кёп миллетли республикабызда жашагъанланы араларында мамырлыкъ бла шуёхлукъ дайым болур ючюн уллу атламды. Башха миллетли сабийле къоншу маданиятны хурметлеуюню, аладан кеслерине бир магъаналы зат алыуну юслеринден сагъыш этсек, багъасы жокъду»,– дегенди Зухра Ханаховна. Ол кюн, керти да, миллетле, районла аралы байрам болгъанды.
4-чю Прогимназияны арбазын омакъ миллет кийимледе жашчыкъла бла къызчыкъла жасай эдиле. Къонакъланы жюреклерин жылытхан а абадан устазланы бла юйретиучюлени, байрамгъа къатышхан къайсы бирини да миллет кийимледе болгъанлары эди. Андан сора да, орус сарафанлада бла омакъ жыйрыкъладагъы къызчыкъла энчи жарыкълыкъ сала эдиле халгъа.
Къонакъбайла кеслерини миллет энчиликлерин белгилеген эрттегили арбаз къурагъандыла. Аны къабартылы халкъны тарыхы бла, жашау турмушу бла, айныуу бла байламлы жарашдыргъандыла. Къол усталыкъларын, юй кереклерин, аш хантларын да кем этмегендиле.
Элбрус районну келечилерини араларында районну администрациясыны таматасыны биринчи орунбасары Толгъурланы Расул, Билим бериу управленияны таматасы Атаккуланы Нюржан, Билим бериу управленияны специалисти Лина Хамзатова, Тырныауузну 3-чю номерли школуну 10-чу номерли сабий садыны таматасы Макытланы Халимат, сабий садны методисти Жолайланы Танзиля, устазлары эм юйретиучюлери, Быллымны сабий садыны сабийлери бла устазлары болгъандыла.
Бизден баргъан сабийчикле, ариу халларын кёргюзтюп, ыспас алалгъандыла. Ала къонакъгъа саугъа бла барыргъа тийишли болгъанын да гитчеликден билгенлери себепли концерт программа хазырлагъандыла. Тырныауузну 10-чу сабий садыны сабийлери устазлары Атмырзаланы Халимат эм Марина Тлизамова бла бирге малкъар халкъны эрттегили тепсеулерин кёргюзтгендиле. Андан сора да, поэтлерибизни назмуларын тауча, орусча да айтхандыла. «Адамды бизни атыбыз», «Минги тау» жырланы айта, къонакъланы кёллерине жетгендиле. Быллымны сабий садыны келечилери уа устазлары бла бирге «Сабийни бешикге салыу» деген эрттегили адетибизни кёргюзтгендиле.
Прохладнадан келген къонакълада, хар замандача, жарыкъ концерт программалары бла къууандыргъандыла. Чам жырла, элберле, халкъ жомакъладан юзюкле да саугъалагъандыла ала байрамгъа жыйылгъанлагъа.
Къонакъбайланы да къуру сабий садларыны сабийлери угъай, школчула да тири къатышхандыла фестивальгъа. Ала миллет тепсеулерин кёргюзтгендиле сахнада оюн халда алгъыннгы адетлерин бла тёрелерин да туура этгендиле.
Байламлыкъда бла шуёхлукъда жашаргъа сабийликден юйретирге керекди, ол жыл санда шуёх болгъан тынчды. Бирде жаланда бир илляуну берсенг неда алышсанг, гитчелени жюрекчиклери байланып къалады. Ол арбаздагъы сабийлени барысы да аллай шуёхлукъгъа ачыкъ эдиле. Ол а тюз юйретиу иш бардырылгъанына шагъатлыкъ этеди. Патриот сезимни балалыкъдан айнытыу бюгюннгю кюнде тюз ызды. Ата журтуна, къоншусуна сюймекликни сабий жюрекде жаратыргъа тийишлиди.
Бай концерт программадан сора къонакъланы хар район жарашдыргъан музей мюйюшлеге экскурсиягъа чакъыргъандыла. Анда бир бирлерини маданият байлыкълары бла игирек шагъырейленир онглары болгъанды. Сабийле хар бири да миллет оюнларын ойнагъандыла. Бизникиле – «Бёрк оюнда», къабартылыла – «Жип тартыуда», оруслула да «Ручеёк» деген оюнлада зауукълукъ тапхандыла.
Байрамны ахырында фестивальгъа къатышханланы бла къонакъланы ыразылыкъ къагъытла бла белгилегендиле.
Элбрус районну администрациясыны таматасыны биринчи орунбасары Толгъурланы Расул Басхан районну таматасына бла саулай да жамауатына ыразылыгъын билдире, къыралыбызны бла республикабызны кючю жаланда байламлыкъда бла миллетле араларында шуёхлукъда болгъанын дагъыда бир кере чертгенди. Мындан ары да быллай аламат тюбешиуле тёрели болуп, бир бирге бет жарыкълы тюбей, къонакъ, къонакъбай да бола жашарларын тежегенди.
Темуккуланы Асият.
