Х.М. Бербеков атлы Къабарты-Малкъар къырал университет 2025 окъуу жылда окъургъа кирирге сюйгенледен керекли къагъытланы алып башлагъанды. Биринчи кюн окъуна ары аслам адам келгенди. 

Бюгюнлюкде вузда медицина академия, 8 институт, халкъла аралы билим бериу школ эм 4 колледж - битеу да 300-ден артыкъ окъуу программа ишлейдиле. Быйыл университетге 5500 студент алынырыкъды, аладан  1639-суна бюджет жерле бёлюнюпдюле.

Окъуугъа алыу кампания бийик технологиялы онгла бла да жалчытылыныпды. Электрон очередьни, онлайн-приёмну хайырланыу, адамланы юслеринден энчи информация криптография бла къорууланыпды, дагъыда тийишли хазырланнган консультантла бла волонтёрла келгенлени не сорууларына да жууапла бередиле. Ол а вузгъа биринчи кере келгенлени ишлерин иги да женгиллетеди. 

Университетни социал политикасына кёре, битеу окъуу жерлени 20 проценти бюджетде къалгъандыла. Квоталы жерледен 87-си СВО-гъа къатышханланы бла Россейни Жигитлерини сабийлерине эм дагъыда аллай бири ёксюз балалагъа бла 1-чи эмда 2-чи группалы сакъатлыкълары болгъанлагъа бёлюнюпдюле. 

Окъуу юйню бошагъандан сора, иш бла бир тюрлю тыйгъычсыз жалчытылыныргъа сюйгенлеге деп вуз 342 целевой жер да бёлгенди. КъМР-ни Саулукъ сакълау министерствосу быйыл  целевой жерлени бир заманда да болмагъанча кёп бёлгенди. Ол специалистле жетишмегенлери бла байламлыды. Ординатурада да болум алайды. 

Шёндю республиканы кёп районларында бла шахарларында да тюрлю-тюрлю специалистле керекдиле:

- Черек районну администрациясы бла Билим бериу управлениясы IT сферада, устазлыкъ эм къурулушчу усталыкъла бла ишлериклени сакълайдыла эм целевой жерлеге себеплик этерге хазырдыла;

- Элбрус районну администрациясы къурулушчуланы хазырлаугъа себеплик этеди;

- Нальчикде уа медицина организациялада бла IT-компаниялада ишлерикле жетишмейдиле да, алагъа энчи эс бёлюнеди.

Быйыл окъургъа кирирге сюйгенлеге ол бек аламат онгду: билимлиле болуп, туугъан жерлерине къайтып ишлерге. 

КъМКъУ аны сайлагъанлагъа ЕГЭ-де алгъан балларына дагъыда 10 балл къошаргъа хазырды. Алай аллай саугъа энчи жетишимлери ючюн этиледи. Сёз ючюн, школну «алтын» эмда «доммакъ» майдаллагъа бошагъанлагъа, «Абилимпикс» эм «Профессионалла» деген конкурслада хорлагъанлагъа. ГТО-дан белгиси болгъаннга уа 3 балл къошулады. Балла кимге къошулгъанларыны юсюнден вузну сайтында тизмеде шагъырейленирге боллукъду.  

Жангылыкъланы юслеринден айтханда уа, быйыл «Клиникалы психология» эм «Медицина-профилактика иш» ызла кийириледиле, педагогикалы колледжде «Юриспруденция» усталыкъ алып башларыкъдыла. Андан сора университетде заочно окъуп, бийик билимли специалист болур онг барды. 

Университетге кирирге сюйгенигизни юсюнден жазылгъан  къагъытны «Госуслуги» порталны хайырлана неда почталада операторланы болушлукълары бла берирге болады. Документлени белгиленнген кюнден кеч къалмай  келтирирге тийишлиди. 

Бакалавриатны бла специалитетни бюджет жерлерине тюшгенлеге къагъытларын 25 июльдан кеч къалмай келтирирге керекди. Вузну ичинде къошакъ экзамен берирге керек болгъанла уа - 15 июльгъа дери. Орта профессионал билим алыргъа сюйгенлеге уа 15 августха дери келтирирге тийишлиди документлерин. 

Аланы алгъан комиссия  кюн сайын (ыйых кюнню санамай) 9:00 сагъатдан 18:00 сагъатха дери ишлейди. Ол КъМКЪУ-ну баш корпусунда орналады (Нальчик шахар, Чернышевский атлы орам, 173. 360004). 

Къасымланы Аминат хазырлагъанды.