Озгъан окъуу жылда тамата класслада билим алгъан жашланы бла къызланы араларында чыгъармачы ишлени «Идеи Д.С.Лихачёва и современность» деген ат бла халкъла аралы конкурсу бардырылгъанды. Анда  Нальчикде «Успех» окъуу арадан  Текуланы Милана дипломгъа тийишли болгъанды.

Конкурсну Санкт-Петербургда  профсоюзланы гуманитар университети бардырады. Жыл сайын ол ишге Россейни алтмышдан аслам регионундан эмда жууукъ тыш къыралладан жюзле бла школчула къатышадыла. Жюри Текуланы Милананы эмда аны устазы Чаниуат Карданованы ишлерине бийик багъа бергенди, Къабарты-Малкъарны Башчысы Казбек Ковковну аты бла бюсюреу письмо да жибергенди. Анда жазылгъаныча, Санкт-Петербургда интеллигенцияны конгрессини таматасы, Эрмитажны директору Михаил Пиотровский эмда Конгрессни толтуруучу комитетини председатели, Гуманитар университетни ректору, жюрини башчысы Александр Запесоцкий Текуланы Милана Дмитрий Лихачёвну чыгъармачылыгъын иги билгенин, къыйын жашау болумдан хапарлы болгъанын, андан къутулууну юсюнден оюмун ангылаталгъанын чертгендиле. 

«Конкурсха къатышхан къызны жаш тёлюню къылыгъын, ниетин да иги билген, сабийлени тюз жолгъа салыр ючюн къолундан келгенни аямагъан устаз юйретеди. Аллай окъуучулары, устазлары бла да Къабарты-Малкъар Республика ёхтемленирге боллукъду», - деп жазылады КъМР-ни Башчысына жиберилген ыспас письмода.

Холаланы Марзият.