Къабарты-Малкъар къырал университетни  Отарланы Керим атлы маданият арасында  Россейни художниклерини союзуну келечиси  Французланы Хусейни жашы Казбекни бу кюнледе  «Кавказ бирди» деген ат бла энчи сурат кёрмючю ачылгъанды. Ол аны Россейни кюнюне  жоралагъанды.

Кёрмючню ачылыууна кёпле къатышхандыла. Аланы араларында  Социал гуманитар институтну  директоруну къуллугъун толтургъан  Геграланы Хаким,  белгили суратчы Ахматланы Леуан, Суратчыланы  халкъла аралы ассоциациясыны  къауумуна кирген Сарбашланы Азнор, Къулийланы Къайсын атлы малкъар къырал драма театрны директору Жангоразланы Мажит, кийизледен музей къурагъан Локияланы Рашид, «Къайсыннга жюз атлам» фондну таматасы  Тетууланы Хадис да болгъандыла. 

Къонакъланы бир къаууму, суратлагъа къарап, кеслерини оюмларын да айтхандыла. «Французланы Казбек ишлеген суратла  халкъны жашаууну алыкъа кишиге да белгили болмагъан бетлерин ачыкълайдыла. Ала уа  окъуучулагъа бютюн хайырлыдыла. Хар суратны да  тарых  магъанасы барды», - дегенди  Геграланы  Хаким.

- Къарачай-малкъар халкъны фахмулу уланыны озгъан заманланы кёргюзтген чыгъармалары бизни тарых магъаналы тинтиулерибизге уллу къошумчулукъ этедиле, - дегенди Тетууланы Хадис.

-  Бу адамны мен таныгъанлы жыйырма жылдан аслам заман болады. Кёрмючлеринде да кёп кере болгъанма, кёп суратлары бла да  шагъырейме. Аны бла байламлы айтырыгъым: ала халкъыбызны маданият хазнасыны бир кесегидиле, аны бла багъалыдыла бизге. Казбекча фахмулу адамла бизге адет-тёрелерибизни, ниет байлыгъыбызны да сакъларгъа, айнытыргъа уллу себеплик этедиле,- дегенди  Локия улу да.

Француз улу уа, келгенлеге ыразылыгъын билдире: «Чыгъармаларым бир адамны окъуна да жюрегине жетген эселе, кесими насыплыгъа санаргъа боллукъма»,-дегенди.

Ол  чыгъармачылыкъ ишинде Уллу Ата журт уруш, анда къыралыбыз болдургъан Хорлам уллу магъананы тутханын чертип айтханды. Аны юйюрюнден  сегиз адам  урушха  кетип, аладан  жаланда экеулен къайтханларын да билдиргенди. «Белоруссияны азатлаугъа тёрт жюзден аслам къарачайлы жаш къатышханды, партизан отрядлагъа командирлик этген алтаулан  да бизни жерлешлерибиз  эдиле. Мен суратларымда аланы сыфатларын ачыкълай, жаш тёлюбюзге бюгюннгю мамыр жашау ючюн къаллай уллу багъа берилгенин билдирирге сюеме»,- дегенди уста. 

Ол  жууукъ заманнга муратларын да туура этгенди. Аладан бири  - къарачай генералланы суратларын ишлеп, аладан энчи кёрмюч къураргъа.  «Ала  ондан асламдыла. Кёрмючде уа алыкъа жаланда экеуленни сураты барды - патчах аскерни генералы  Кърымшамханланы Айтекни бла тёрт урушха къатышхан совет генерал Магометланы Солтанны», - деп да къошханды художник.

Сёзюню ахырында уа Французланы Казбек  кёрмючню къураугъа себеплик этгенлеге, анга къараргъа келгенлеге да жюрек ыразылыгъын билдиргенди.    

КъМКъУ-да  Отарланы Керимни атын жюрютген малкъар маданият араны башчысы  Байтуугъанланы Исмайыл а художникге сурат кёрмючюн окъуу юйню залында къурагъаны ючюн ыспас этгенди эмда  КъМКъУ-ну  проректору къол салгъан бюсюреу къагъытны да бергенди. 

Холаланы Марзият.