Бюгюнлюкде  школчу сабийлени жай солууларыны эм зауукълу кезиулериди. Жыл сайын да шахарланы, эллени мектеплерини кеслеринде да къураладыла лагерьле.
Огъары Малкъарны Абайланы Мисост атлы 2-чи номерли школунда  да быйыл аллай «Саулукълу сабийлени айрыкамы» атлы лагерьде 26 жашчыкъ бла къызчыкъ солуйдула. Аны таматасы Къазакъланы Мариям Абуевна бизге билдиргеннге кёре, ала кёп сабийли юйюрледендиле, адамлары энчи аскер операциягъа къатышханла да бардыла.

Сабийлени эки къауумгъа бёлгендиле – «Къуш балала» эмда «Билимлиле». Ала кеслери да 8-10 жыллыкъладыла. Лагерьге эрттенликде тогъузгъа келип, кюндюз ючню жарымына дери турадыла. Алагъа уа мында сегиз юйретиучю  къарайды, хар кюнден ала экишер-экишер алышынадыла. Ойнагъандан тышында да, тренерлери Забакъланы  Жамал бла Занибекланы Алимдиле, аланы музыкагъа, тепсерге, жырларгъа да тюшюндюредиле.

Дагъыда аланы миллет кийимлени  оюуларын сурат этип ишлерге, накъышланы салыргъа да юйретедиле. Кийиз ийлеуден да мастер-класс къурап, аны къалай этилгенин кёргюзтедиле къызчыкълагъа. Аллай затланы кёрюп ёсген сабийлени уа миллет энчиликлени юслеринден ангылаулары боллукъду, билимлери айнырыкъды.

Сабийлеге деп мында хазырланнган аш-суу да элпекди,  этден этилген ашарыкъладан башлап жемишлеге-кёгетлеге дери да. Ашны уа тёртеулен жарашдырадыла. Аланы тургъан жерлерини тазалыгъы да жалчытылыннганлай турады. Мында хар нени да хакъсыз болгъанын белгилерчады. Андан сора да, быллай лагерь эндиге дери хар районда жыл сайын бир мектепде ачылып тургъан эсе, ахыр юч жылны ичинде ол Огъары Малкъарны бу школунда ишлеп тургъанын да.

Бу кюнледе малкъарлыланы лагерьлеринде къонакъда КъМР-де Сабийни эркинликлери жаны бла уполномоченныйи Амина Бадракова, Черек районну администрациясыны башчысы Къулбайланы Алан, прокурору Хасан Эржибов, билим бериу управлениясыны, Жаш тёлю чыгъармачылыкъ юйюню, осуйлукъ этген эмда къарагъан бёлюмню келечилери, башхала да болгъандыла.  Сабийле алагъа жарыкъ халда тюбегендиле. Къонакъла  уа татлы ашарыкъладан саугъала этгендиле. Аны бла бирге лагерьге топла, ракеткала, стол оюнла, альбомла, бояула, кёп башха затла да келтиргендиле. Ол кюн мында уллу концерт да болгъанды, аны уа районну Маданият юйюню келечилери хазырлагъандыла.

Бюгюнлюкде быллай лагерьлени эллени къайсы биринде да къурарча онгланы болдурууну юсюнден айтылгъанлай келеди. Ала районда энди келир жыллада аслам халда ачыла турурча мадарла этилликлерини юсюнден да ол кюн Къулбай улу айтханды эмда ышандыргъанды. Алай болса уа, сабийлени жай солууларын бютюнда хайырлы эмда зауукълу оздурурча онглары боллукъду.

Лагерьде школчула 21 кюнню ичинде турадыла. Аны жабылыуу бла байламлы да уллу байрам къуралыучуду. Бу жол а сабийлени мектепни кесини улоуу бла элден чыкъгъан жерде тамашалыкъ табийгъатлы тийреге жолоучулукъгъа элтирикдиле. Айхай да, жай солуулары эслеринде къалырча, сейир программаны  да хазырларыкъдыла. Башхача айтханда уа, сабийлеге зауукълукъну сынатыр ючюн, мында тюрлю-тюрлю амалланы хайырланадыла.

Мокъаланы Зухура.