«Бизникиле жанлыбыз» деген ат бла  Нарткъалада  жандауурлукъ акция бардырылгъанды. Ол энчи аскер операциягъа къатышханлагъа  болушлукъгъа деп къуралгъан эди.  Аны КъМР-де  Ата журтну аскерчилерини  юйюрлерини комитетини председатели Карина Орехова  эмда аны орунбасары Алла Алимова, «Единая Россия» политика партияны  республикада бёлюмю,  Урван районну администрациясы да  бирге  къурап бардыргъандыла.

Жандауурлукъ ярмарка башланырдан алгъа алайгъа келгенлени алларында  Карина Орехова  сёлешгенди. Ата журтну аскерчилерини аналарына, юйюрлерине, эгечлерине, юй бийчелерине  кёп жапсарыу, кёл этдириу  сёзле да айтханды. «Бизни жашларыбыз  аскер операциягъа къатышхан къадарда, биз алагъа билеклик этерикбиз, ала юйлерине, юйюрлерине сау-саламат къайтырларын да бек сюебиз. Тюз ниетли адамла не заманда да  къыйын болумда болушлукъгъа мычымай жетедиле. Ол бизни  тёребизди. Аны себепли мындан ары да быллай акцияла къурап, аскерчилерибизге болушурукъбуз»,-дегенди  Карина Орехова.

Сёзсюз, ол ишге кесини уллу  юлюшюн  Урван районну администрациясыны башчысы Хазрит Тлежуков, «Единая Россия» политика партияны республикада  бёлюмюню секретары Жаннета Жемухова,  «Единая Россия»  партияны «Молодая  гвардия» жамауат организациясыны  башчысы  Асланбек Эркенов да къошхандыла. Ала да къуру къоллары бла келмегендиле.

Жандауурлукъ акциялагъа къатышханлагъа  Нарткъалада Маданият юйню  артистлери орус, къабарты эмда малкъар тилледе  бу жерли авторланы жырларын айтхандыла. Ары келген гитче нарткъалачылагъа бла аны къонакъларына деп а,  жомакъланы жигитлери, тюрлю-тюрлю конкурсла, оюнла къурагъандыла, хакъсыз мороженое, къурмач, башха татлы затла  да юлешгендиле.

Ол  кюн жыйылгъан ахча, башха ырысхы да  энчи аскер операциягъа къатыша тургъан аскерчилени юйюрлерине берилликди.

Холаланы Марзият.