Нальчикде онкология диспансерни къурулушу «Узакъ эмда тири жашау» миллет проектни чеклеринде барады. Бу объект битсе, анда сау кюнню кечинирге жараулу - 250 эмда кюндюзгю стационарда уа 24 жери боллукъду, дегендиле КъМР-ни Къурулуш эмда жашау журт-коммунал мюлк министерствосунда.

Диспансерде бир ненча багъыу, ол санда хирургия эмда операцияла бардыргъан бёлюмле ишлерикдиле. Радиология корпусда уа лучевой тинтиуле эмда багъыу бла кюреширикдиле. Поликлиникасында уа бир сменнге жюз саусузгъа къараяллыкъдыла.

Бу объект бек магъаналыды, нек дегенде шёндюгю диспансер озгъан ёмюрден бери хайырланыудады, онкология аурууланы багъыу жаны бла излемлеге келишмейди. Учреждение битеу республикадан саусузланы жумушларына къарагъаны себепли анда жерлени, медицина ишчилени санын кёбейтирге, болумну да игилендирирге кереклиси баямды.

Жангы объектде уа къурулуш ишле талай жерде барадыла. Бюгюнлюкге аны къабыргъаларын тышлай турадыла, отоу тюплерине плитка саладыла, жылытыу, канализация, вентиляция системаланы орнатадыла, ток ызланы жарашдырадыла эмда башха ишле бла кюрешедиле.

Инфраструктураны да аслам кесеги орнатылгъанды, ол санда  модуль котельня, эки трансформатор подстанция, тышындан келген электрокюч ызла. Келир жылны ахырына диспансерде хар нени да тамам этип, аны керек затла бла толусунлай жалчытыргъа таукелдиле.

Омарланы Мурат хазырлагъанды.