Къабарты-Малкъарны Жамауат палатасында профилактика халда ветеринар къарауну бардырыуну сюзгендиле.

Палатаны Агропромышленный комплексни айнытыу, элле эм экология жаны бла комиссиясыны башчысы Юрий Колесников айтханыча, биодарманланы бла вакциналаны заманында хайырланыу ящур, сибирь язва,  къутургъан ауруудан дегенча аурууладан сакъланыргъа болушады. Ол мурат бла Къырал ветеринар служба вакцинацияны дайым бардырады.  

 Республикада Ветеринария управленияны башчысыны орунбасары Акъболатланы Зариф жугъуучу аурууладан сакъланыу, лаборатор-диагностика жумушланы, ветеринар-санитар тинтиулени бардырыу жаны бла къаллай иш тамамланылгъаныны юсюнден билдиргенди. Толтурулургъа тийишли жумушланы тизмесине тийишлиликде федерал бюджетден бёлюннген ахчагъа инфекция ауруула жайылмазча вакцинала бла диагностикумла алынадыла. 2019 жылдан башлап агъач жаныуарладан жукъгъан къутургъан ауруу  тыяр ючюр «Рабистав» дарман келтириледи. Жыл сайын, жаз башында бла кюзде, ветеринар служба Къабарты-Малкъарны Табийгъат байлыкъла эмда экология министерствосу бла бирге агъач жыртхыч жаныуарланы вакцинациясындан да бардырады, ол мурат бла дарманла хар районда уучу жерлен тийрелеринде салынадыла. Эсеплеге кёре, былтыр 16 минг жаныуар дарман алгъандыла, аны хайырындан регионда бу ауруу чыкъгъан кезиуле азайтылгъандыла. Россельхознадзорну жер-жерли бёлюмю бла уа къанатлыланы сакълаугъа да къаралгъанды.

«Ветеринарияны» юсюнден законнга кийирилген тюрлениулеге тийишлиликде 2024 жылны 1 мартындан башлап жаныуарланы эсеплеу бла байламлы къоранчла аланы иелерине салынадыла, эсеплеуню тюрлюсюн а къайсы жаныуар болгъанына кёре сайларгъа жарайды. Ветеринар законодательствону «Хорриот» жаны бла бёлюмюне тийишлиликде служба эл мюлкде къанатлыланы бла жаныуарланы тюрлюлерини тизмесин жарашдыргъанды, алай бла 371 787 карточка толтурулгъандыла, битеу да эсепде 4 миллион 696 минг 907 жаныуар бла къанатлы бардыла. «Меркурий» бёлюмде эсепде – 5 миллион 934 минг 855, «Церберде» - 5 минг 240 минг жаныуар бардыла.

Ветеринар тынчлыкъны сакълау, жыйылгъанла чертгенлерича, диагностика лабораторияланы тынгылы эм болжалдан кеч къалмай тамамлау, маллада аурууланы заманында ачыкълау бла къысха байламлыды. Бюгюнлюкде Къабарты-Малкъарда 1 ветеринар лобаторатория, 13 ветеринар-санитар экспертиза ара ишлейдиле. Белгиленнген кезиуде ала 700 мингден аслам тинтиу бардыргъандыла.

Жыйылыуда хауле жаныуарланы тутарча жерлени ишлеу, кадрланы хазырлау, мюлклеге себеплик этиу бла байламлы соруула да кётюрюлгендиле. Аны бла байламлы комиссияны башчысыны орунбасары Шауаланы Артур управлениягъа сынау халда 2 ветеринар араны къураргъа, сора аланы хайырлылыкъларына къараргъа эсгертиу этгенди.

Комиссияны келечиси Джулета Тутукова «Къабарты-Малкъар Республикада эллени битеулю халда айнытыу» къырал программаны чегинде муниципалитетле ёлген жаныуарланы кюйдюрюрча мобильный печьле алыргъа сюйгенлерин бла къалгъанларын соргъанды. Акъболатланы Зариф айтханыча, аны юсюнден къагъытла Элбрус бла Басхан районладан келгендиле.

Кульчаланы Зульфия.