Яникойда амбулатория 1968 жылда ишленнгенди. Андан бери анга бир кере да тынгылы ремонт этилмегенди. Ол себепден иги да тозурагъанды, аны бла бирге тынгылы медицина болушлукъ берирча излемлеге да артыкъ келишмейди, деп билдириледи КъМР-ни Саулукъ сакълау министерствосуну пресс-службасындан.

Сагъынылгъан сылтаула бла байламлы аны игилендирирча «Саулукъ сакълау» миллет проектни «Биринчи болушлукъ берген бёлюмюн  жангыртыу» регион программасына  къошулургъа онг табылгъанды. Бюгюнлюкде анга тынгылы ремонт этиле турады. Ол санда башын къанжал бла жабып,  инженер сетьлерин тартып, терезелерин салып,  жылытыучу системасын алышып, ич эм тыш къабыргъаларына  плитка жасап бошагъандыла. Бюгюнлюкде ичинде   башха ууакъ-тюек  жумушла бла кюрешедиле. Проектге кёре, арбазын да айбатландырырча мадар этилликди. 

Медицина учреждение «аяулу технология» амал бла ишлерикди: саусузгъа тап болурча бар онгла къураллыкъдыла эм игиси уа тынгылы медицина болушлукъ берилликди. Мында терапевтни, педиатрни, акушер-гинекологну эм  стоматологну   кабинетлери эм кюндюз жатханлагъа   стационар да ишлерикди.

Ремонт ишле баргъан кезиуде юч мингден аслам  саусузгъа  къоншу Каменка элни амбулаториясында къаралады. Планнга кёре, ол сменагъа 25 къарарча боллукъду. 

Объект  жылны ахырындан кеч къалмай, хайырланыргъа берилирге керекди.

Магометланы Сулейман.