Россейни Правительствосуну быйыл 7 мартдан 293-сю номерли бегими бла кир-кипчикни жарашдырыуда жангы жорукъла къабыл этилгендиле; ала быйыл сентябрьде ишлеп башларыкъдыла. Алада кёп затны юсюнден айтылады, эм магъаналыларын а бу къысха материалда туура этейик.

Кир-кипчикни айырып жыйыу. Энди ол хайырланыучулагъа, регион операторлагъа да борчлу иш боллукъду. Ол кеси да РФ-ни субъектинде бу жумушну тамамлау жаны бла низам тохташдырылса кюч аллыкъды. Биринчилери кир-кипчикни аллай операторгъа талай амал бла жибераллыкъдыла, ол а аны къатыш этмей жарашдырыргъа керек боллукъду. 2030 жылда 1 январьдан башлап, кир-кипчикни айырып жыйыу хар жерде да борчлу боллукъду. Бу ишде тюрсюнлю орунланы хайырланырыкъдыла.

Башха тюрлениуле. Уллу затланы, къалгъан-къулгъанланы хайырланыучула энчи жерлеге кеслери жетдирирге керек боллукъдула. Регион оператор а,  аланы биринчиле бла келишим бар эсе, ташып кетерликди.

Регион оператор хайырланнган транспортда спутник навигация система ишлерге керекди.

Бузукълукъланы талай тюрлюсю ючюн операторну сюдню оноу бла ишни бардырыргъа эркинлигин сыйырыргъа боллукъдула.

Къачан кюч аллыкъдыла эмда хайырланыллыкъ болжалы. Жангы жорукъла быйыл 1 сентябрьде ишлеп башларыкъдыла. «Тюрсюнлю контейнерле» бла байламлы тюрлениуле уа – 2030 жылда 1 январьда. Шёндюгю жорукъланы болжалы алты жылды, ала 2031 жылда сентябрьге дери хайырланылып турлукъдула.

Магъанасы. Жангы жорукъла «кир-кипчик реформаны» эбине жетдиредиле. Кир-кипчикни айырып жыйыу, аны бла кюрешиуге себеплик этиу, бу бёлюмде болумну игилендирирге керекдиле. Анга уллу кёллю болгъанлагъа административ эмда мюлк жаны бла жууаплылыкъ кючленирге боллукъду. Дагъыда къыралны субъекти жангы низамгъа заманында кёчмей къалса, ахшы умутла да алай къаллыкъдыла.  

Улбашланы Мурат хазырлагъанды.