Илъэс блэкIам Къэбэрдей-Балъкъэрым и хьэрычэт IэнатIэ мащIэмрэ цIыкIумрэ (микро) пэрытхэм щыщ IуэхущIапIэу 73-м я мыхьэнэм хагъэхъуащ икIи я лэжьыгъэхэмкIэ зэфIэкI нэхъ лъагэ зиIэхэм яхыхьащ. ЖыпIэнурамэ, IуэхущIапIэ 67-р хьэрычэт IэнатIэ цIыкIум (микро) хэкIри, хьэрычэт IэнатIэ мащIэм кIуащ. Абы нэмыщI, хьэрычэт IэнатIэ цIыкIумрэ мащIэмрэ я IуэхущIапIэ щырыщ хьэрычэт IэнатIэ курытым хыхьащ.

  Апхуэдэ щIыкIэкIэ, 2023 гъэм зи статусхэр зыхъуэжа IуэхущIапIэхэр 62-рэ хъуауэ щытамэ, нэгъабэ ар 73-м нызэрыхьэсащ. Экспертхэм зэрыжаIамкIэ, я мыхьэнэхэмрэ зэфIэкIхэмрэ хагъахъуэурэ зы статусым икIыурэ нэгъуэщI статусхэр зэзыгъэгъуэт IуэхущIапIэхэм я бжыгъэхэм щIыхэхъуэм и щыхьэтщ хьэрычэт IэнатIэ мащIэмрэ курытымрэ республикэм зыужьыныгъэ зэрыщагъуэтым, ахэр ефIэкIуэнрэ адэкIи заубгъунрэ щхьэкIэ щыIэ Iэмалхэр нэсу зэрылажьэм.

  Къыхэдгъэщынщи, 2019 - 2024 гъэхэм къэралым щыIа «Хьэрычэт IэнатIэ мыинымрэ курытымрэ, щхьэзакъуэ хьэрычэтыщIэ жэрдэмыр дэIыгъыныр» лъэпкъ пэхуэщIэм щынэхъыщхьэу щытар а IэнатIэхэм пэрыт IуэхущIапIэхэм я бжыгъэм хэгъэхъуэнырт. АтIэ, иджы къыхалъхьа,  «Зэхьэзэхуэр зи лъабжьэ экономикэ лъэщ» лъэпкъ пэхуэщIэм нэхъыбэу зытригъащIэр щыIэ IуэхущIапIэхэм заужьа зэрыхъунымрэ зэрызаубгъунымрэщ.

          ХЬЭЩЫКЪУЕЙ Олег.